ماڵپەری قورئانی پیرۆز

ئاماده‌کردنى : وشیار صدیق
عه‌مرى کوڕى سابت پیاوێکى نه‌وه‌ى   عبد الاشهل  بوو ناسرابوو به‌ ،، ئه‌صیره‌م ،، ئه‌م پیاوه‌ هه‌رکه‌سێک داواى موسوڵمان بوون و قبوڵ کردنى ئیسلامى لێده‌کرد ، ئه‌و به‌رپه‌رچى ده‌دایه‌وه‌و ئاماده‌نه‌بوو بێته‌ ناو ئیسلام ،

له‌کاتى غه‌زاى ئوحوددا له‌بڕیارێکى کتوپڕدا شمشێره‌که‌ى هه‌ڵگرتو چووه‌ سه‌نگه‌رى موسوڵمانان و له‌گه‌ڵ بێ باوه‌ڕاندا که‌وته‌ جه‌نگ ، زۆر مه‌ردانه‌ کوشتارێکى گه‌وره‌ى ئه‌نجامدا ، تاسه‌ره‌نجام له‌چه‌ند شوێنێکه‌وه‌ به‌سه‌ختى بریندارکراو که‌وته‌ سه‌ر زه‌وى.
له‌کۆتایی جه‌نگه‌که‌دا پیاوانى نه‌وه‌ى  ( عبد الاشهل ) که‌وتنه‌ گه‌ڕان به‌شوێن کوژراوه‌کانیاندا. بینیان وا ( ئةصيرةم ) له‌ پێش ده‌میاندایه‌و به‌سه‌ختى بریندار بووه‌، له‌م دیمه‌نه‌ سه‌رسام بوون ،چونکه‌ ئه‌وان پێش جه‌نگه‌که‌ که‌به‌جێیان هێشت  موسوڵمان نه‌بوو بوو وه‌ئاماده‌ش نه‌بوو ،  بۆیه‌ لێیان پرسى : ئایا له‌به‌ر غیره‌ى نه‌ته‌وه‌یی ئه‌م کاره‌ت کردووه‌ یان به‌هۆى هاتنه‌ ناو ئیسلام و موسوڵمان بوونه‌وه‌؟
وتى : به‌ڵکو حه‌زم به‌ناو ئیسلام کردو باوه‌ڕم به‌ خواو پێغه‌مبه‌ره‌که‌ى کردو ته‌سلیم بووم، پاشان شمشێره‌که‌م هه‌ڵگرت و له‌خزمه‌تى پێغه‌مبه‌رى خوادا که‌وتمه‌ جه‌نگ هه‌تا به‌و شێوه‌م لێهات که‌ده‌بینن ، پاش که‌مێک له‌به‌رده‌ستیاندا گیانى سپارد، کاتێ گه‌ڕانه‌وه‌ ئه‌و باسه‌یان بۆ پێغه‌مبه‌ر گێڕایه‌وه‌ ، ئه‌ویش فه‌رمووى : به‌دڵنیاییه‌وه‌ ئه‌و ئه‌هلى به‌هه‌شته‌.