ماڵپەری قورئانی پیرۆز

عادل شاسوارى
قورئانى پیرۆز ئه‌م كتێبه‌ ئاسمانیه‌یه‌ كه‌ زانا سه‌رسام ده‌كات ، دانا عاشقى حیكمه‌ت ده‌كات ، به‌ ته‌نها سه‌یركردنى ئایه‌ته‌كانى زیكره‌ ،ژوانى ئه‌ویندارانه‌ى ئه‌لقه‌ى ڕامان و ووردبوونه‌وه‌ و شوكره‌

، سه‌ره‌تایه‌كه‌ بۆ تێگه‌یشتن لێى ، دیباجه‌یه‌كه‌ بۆ سه‌فه‌رێكى دورو درێژ ، بۆ ووردبونه‌وه‌یه‌كى قووڵ و بۆ گه‌شتێكى پڕ به‌ره‌كه‌ت .
له‌ گه‌ڵ قورئاندا ژیان هاوڕێیه‌تى و سه‌ودا سه‌ریه‌ك دروست ده‌كات .. كه‌س جێ ى ئه‌وت بۆ ناگرێته‌وه‌ .. له‌ گه‌ڵ قورئان هه‌ڵكردن ساچانه‌ له‌ گه‌ڵ ژیاندا ..به‌ جۆرێ كه‌ هاورێى رازى ئه‌ویندارانه‌ى گه‌ردوون و ده‌روونه‌ .. ناسینى قورئان مرۆڤ ده‌گۆرێ ئاسان نییه‌ ده‌ستى لێ هه‌ڵگرێ .. بێ نوورى چراى ئه‌و ئاسان نییه‌ ژیان بگوزه‌رێنێ ..
ده‌تانه‌وێت ته‌مه‌نى كه‌م و دیارى كراوتان بگۆڕن به‌ زۆرو درێژخایه‌ن ؟
ئه‌مه‌ ئه‌و پرسیاره‌ بوو كه‌ سه‌عیدى نه‌ورسى له‌ خه‌ڵكى ده‌كرد ..وه‌ڵامه‌كه‌شى ئه‌گه‌ر (به‌ڵى ) یه‌ .. ئه‌وا باشترین ڕێگا:
- ژیانه‌ بۆ خوا .. له‌به‌ر خوا .. له‌ پێناوى خوا
-باشترین ڕێگاى ئه‌و سێ خاله‌ش ژیانه‌ له‌ گه‌ڵ قورئاندا.
- ئه‌وكاته‌ ده‌بینى یه‌ك به‌ یه‌كى خوله‌كه‌كانى ته‌مه‌نه‌ كورته‌كه‌تان بوونه‌ته‌ چه‌نده‌ها ساڵى زۆر .. ته‌مه‌نێكى باقى و نه‌بڕاوه‌ ..به‌ره‌كه‌تێكى فراوان و بێكۆتا .
قورئان وه‌ك ئینسكلۆپیدیایه‌كى به‌ر فراوان لێوان لێوه‌ له‌ ڕه‌هه‌ندى مێژوویى و كۆمه‌ڵایه‌تى و ده‌روونى و زانستى ، جا داڕتنى ئه‌م ڕه‌هه‌ندانه‌ به‌ فورمه‌له‌كردنێكى ئه‌ده‌بى و تێهه‌ڵكێشى چه‌ندان بوارى زانستى و سه‌ره‌داوى  مه‌عریفى واى كردووه‌ كه‌ ئاسان نه‌بێت به‌ بێ ڕێبه‌ر بتوانى په‌ى به‌ نهێنیه‌كانى به‌ریت .. بۆیه‌ پێویستمان به‌ هونه‌رێك هه‌یه‌ بۆ تێڕامان ،به‌ ڕێبه‌رێك هه‌یه‌ تێفكرین له‌ گه‌وهه‌رى ئایه‌ته‌كان و مه‌وداو ماناى سوره‌ته‌كان و یاساو ڕێساى پێكه‌وه‌ گرێبه‌ستى ته‌واوى موفره‌ده‌و بابه‌ته‌كانى
ژیان له‌ سایه‌ى قورئاندا گه‌وره‌ترین هه‌نگاوى سه‌فه‌رو جوانترین چركه‌كانى ته‌مه‌نه‌ .
پێشه‌كى كتابى ڕامان له‌ قورئان