ماڵپەری قورئانی پیرۆز

ئاماده‌کردنى/سانا حمدامین
بێ گومان ئه‌م هه‌موو جۆره‌ سزاو ئازاره‌ بو سۆو سه‌ختانه‌ گریان و هاوارى لێ په‌یدا ده‌بێت و شین و واوه‌یلاى لێ ده‌که‌وێته‌وه‌ چونکه‌ له‌ئێسقان و مۆخ کارده‌کات ئه‌وه‌تا ده‌بینین قورئانى پیرۆز  به‌ووردى ده‌نگ و هاوار و سکاڵاى دۆزه‌خى یه‌کانمان بۆ تۆمارده‌کات و ده‌فه‌رموێت [وَإِذَا أُلْقُوا مِنْهَا مَكَانًا ضَيِّقًا مُّقَرَّ‌نِينَ دَعَوْا هُنَالِكَ ثُبُورً‌ا]الفرقان/١٣ واته‌ کاتێ به‌ده‌ست و مل فرێ ده‌درێنه‌وه‌ شوێنێکى ته‌نگه‌به‌ر له‌ دۆزه‌خدا هاوارده‌که‌ن له‌و شوێنه‌دا هاوارى ماڵ وێرانى و له‌ناوچوون. هه‌روه‌ها ده‌فه‌رموێت [أَن تَقُولَ نَفْسٌ يَا حَسْرَ‌تَىٰ عَلَىٰ مَا فَرَّ‌طتُ فِي جَنبِ اللَّـهِ وَإِن كُنتُ لَمِنَ السَّاخِڕ‌ينَ]الزمر/٥٦ واته‌ ئه‌وکه‌ ده‌ڵێت ئاى ماڵ وێران خۆم چۆن که‌م ته‌رخه‌م بووم له‌ئاستى مافه‌کانى خواى گه‌وره‌دا له‌ دنیادا گاڵته‌م به‌ئاین و دوارۆژ ده‌هات.

باوه‌ردارى خۆشه‌ویست سه‌یرکه‌ ئه‌م بێ بروایه‌ چۆن هاوارى لێ به‌رز بووته‌وه‌ په‌نجه‌ى په‌شیمانى ده‌گه‌زێت نه‌ک هه‌ر په‌نجه‌ى به‌ڵکو ئه‌وه‌نده‌ سه‌ر لێ ده‌شێوێت تا هه‌ردوو ده‌ستى خۆى ده‌کات به‌ده‌میدا.وه‌ک خواى گه‌وره‌ ده‌رباره‌ى بۆمان ده‌گێرێته‌وه‌ ده‌فه‌رموێت [وَيَوْمَ يَعَضُّ الظَّالِمُ عَلَىٰ يَدَيْهِ يَقُولُ يَا لَيْتَنِي اتَّخَذْتُ مَعَ الرَّ‌سُولِ سَبِيلًا ]الفرقان/٢٧ واته‌ له‌و رۆژه‌دا سته‌م کار قه‌پ ده‌کات به‌ هه‌ردوو ده‌ستى داو ده‌ڵێت خۆزگه‌ له‌گه‌ڵ پێغه‌مبه‌ر صلى الله علیه‌ وسلم رێگه‌م بگرتایه‌به‌ر.