ماڵپەری قورئانی پیرۆز

دەگێڕنەوە کە دزێک چووە ماڵی مالکی کوڕی دینار ھیچی لەم ماڵە نەبینی بیدزێ. مالیک بینی کە دزە ھاتووە، لە ناو نوێژ بوو بە کورتی نوێژی تەواو کرد پاشان ئاوڕی دایەوە لە دزەکەء سەلامی لێ کرد پێی ووت: خوا تۆبەی تۆ وەرگرێت ھاتی بۆ ماڵم ھیچی تێدا نەبوو،

بەڵام نایەڵم بڕۆیتە دەرەوە تاکو شتێک بۆ خۆت نەبەیت، ھەڵسا چوو قاپێکی پڕ ئاوی ھێنا ووتی وەرە دەست نوێژ بگرە بەم ئاوە دوو ڕکعات نوێژ بکە چونکە تۆ لەم ماڵە دەردەچی بە باشتر کە بۆی ھاتی.

دزەکە ووتی: باشە بە ڕێزەوە ھەڵسا نوێژی کرد. ووتی: بۆم ھەیە دوو ڕکعاتی تر بکەم؟ مالک ووتی: بەڵێ ھەتا خوا حەز دەکات بیکە. دزە تاکو بەیانی نوێژی دەکرد. مالک ووتی: ئینجا بڕۆ بۆ ماڵت بە سەرکەوتوویی. ووتی: گەورەم ناڕۆم لە لات دەمەوێ لە لات بمێنمەوە چونکە نیەتی ڕۆژوی بە یانیم ھێناوە. مالک ووتی: باشە بە کەیفی خۆت بە. دەڵی چەند ڕۆژێکی لەلا مایەوە ڕۆژ بە ڕۆژوو شەویش ڕاوەستاو لە بەرامبەر خوا. کە ویستی بڕوات ووتی: ئەی مالک من نیەتی تۆبەم ھێناوە کە تۆبە بکەم. مالک ووتی: ئەوە بە دەست خوایە. کابرا تۆبەی کرد بە جوانیء بە پاکی ئینجا دەرچوو.

لە ڕێگادا گەیشتە یەکێ لە دزەکان پێی ووت: وا گومان دەبەم کەوا خەزێنەیەکت دۆزیبێتەوە. کابرای تۆبەکار ووتی: برام خەزێنەی چی چوومە ماڵی مالکی کوڕی دینار دزی لێ بکەم بەڵام ئەو منی دزی ئێستاش تۆبەم کردووە بەردەوام دەبم لەسەر ئەم خوا پەرستیە تاکو دەگەم بەوەی کە خۆشەویستانی خوا پێیگەیشتوون.