ماڵپەری قورئانی پیرۆز

گۆشتی مردارەوەبوو کۆگایەکە بۆ میکرۆب و نەخۆشییە کوشندەکان... ئایا ئەگەر گرامێک خوێن یان گرامێک گۆشت لە شوێنێکی دیار و ئاشکرادا دابنێین و بمانەوێت دوای سێ یان چوار کاتژمێری تر بەکاری بێنین، ھیچ زیانێکی دەبێت؟

بەدڵنیاییەوە زیانێکی گەورە بەر بەکارھێنەرەکەی دەکەوێت. لەوانەیە میکرۆبی نەخۆشی لەڕێی چەقۆ بەکارھاتووەکەوە بۆ خوێنەکە گوێزرابێتەوە، یان لەڕێی ھەواری دەوروبەریەوە. ئەگەر ژمارەیەک میکرۆب بەھەر ڕێگایەک بۆ خوێنەکەی گوازرانەوە، ئەوا ھەر تاکە میکرۆبێک بەشێوەیەکی ئەندازەیی ھەموو نیو کاتژمێرێک چەند ھێند دەبێتەوە، ھەر میکرۆبێک دەبێتە دوان و... خۆئەگەر واماندانا ھەزار میکرۆب بۆ ئەو یەک گرام خوێنە گوازراونەتەوە، ئەوا دوای نیوکاتژمێر دەبێتە دووھەزار، دوای کاتژمێرێک دەبنە چوار ھەزار و پاش کاتژمێر و نیوێک دەبنە ھەشت ھەزار و پاشان ژمارەیان زیاددەکات بۆ شانزەھەزار، دوای تێپەڕبوونی دوو کاتژمێر، پاش سێ کاتژمێریش ژمارەی میکرۆبەکان دەبنە شەست و چوار ھەزار کە بەتەواوی ئەو گرام خوێنە داگیر دەکەن. ئەمە سەرەڕای ئەو ڕاستییەی کە ھەندێک لە جۆرەکانی بەکتریا وەک بەکتریا چیلکەییەکان (زۆبەشیان مەترسیدارن) زۆر خێراتر لەم نموونەیە لە خوێندا گەشەدەکەن. 

ئەوەش زانراوە خوێنی ئاژەڵەکە ڕاستەوخۆ دوای مرداربوونەوەی ژمارەیەکی زۆر میکرۆبی تێدەچێت (لەبەرئەوەی لاشەی ئاژەڵەکە بەرگری نامێنێت) و بەوەش پیس و زەرەرمەند دەبێت بۆ تەندروستی مرۆڤ، ئەگەر خواردیەوە، یاخود لە جێگایەک ھەڵی بگرێت و دواتر بیخواتەوە.