ماڵپەری قورئانی پیرۆز

نووسینی / سه‌روه‌ر حسن

نووسینگه‌ی ته‌فسیر

خوای گەورە دەفەرموێت:{وَاللَّهُ أَنْزَلَ مِنَ السَّمَاءِ مَاءً فَأَحْيَا بِهِ الْأَرْضَ بَعْدَ مَوْتِهَا إِنَّ فِي ذَلِكَ لَآيَةً لِقَوْمٍ يَسْمَعُونَ (65)} [النحل]، واتە: ھەر خوا بارانی لە ئاسمانەوە باراندووە و زەوی پێ زیندوو کردووەتەوە دوای ئەوەی کە مردبوو، بەڕاستی ئا لەو دیاردەیەدا نیشانە و بەڵگەی تەواو ھەیە بۆ کەسانێک کە گوێ بۆ ڕاستی دەگرن.

یان دەفەرموێت:{وَمِنْ آيَاتِهِ أَنَّكَ تَرَى الْأَرْضَ خَاشِعَةً فَإِذَا أَنْزَلْنَا عَلَيْهَا الْمَاءَ اهْتَزَّتْ وَرَبَتْ إِنَّ الَّذِي أَحْيَاهَا لَمُحْيِي الْمَوْتَى إِنَّهُ عَلَى كُلِّ شَيْءٍ قَدِيرٌ (39)} [فصلت] واتە: لە بەڵگە و نیشانەکانی خوا ئەوەیە کە دەبینیت زەوی کش و ماتە، جا کاتێک باران بەسەریدا دەبارێنێت دەخرۆشێت و گەشە و نەشونما دەکات، چونکە بەڕاستی ئەو زاتەی کە زەوی زیندووکردەوە، مردوانیش زیندوو دەکاتەوە، بێگومان ئەو خوایە دەسەڵاتی بەسەر ھەموو شتێکدا ھەیە.
کشتوکاڵ کردارێکە بەھۆیەوە مرۆڤ پیشانی خۆی دەدات چۆن خوای مەزن زەوی لەدوای مردنی بە ئاو زیندوودەکاتەوە، کاتێک وشک و زەرد ھەڵگەڕابوو و ھەنووکە لێوانلێوانە لە ژیان و زیندەوەران، بەوجۆرە مرۆڤ بەچاوی خۆی ھەندێک دیاردە و توانای خوا دەبینێت لە بەدیھێنانی ژیان لە زەوی مردووەوە. مرۆڤیش لە خاکی زەوی بەدیھێنراوە، وەک پەروەردگار دەفەرموێت:{وَمِنْ آيَاتِهِ أَنْ خَلَقَكُمْ مِنْ تُرَابٍ ثُمَّ إِذَا أَنْتُمْ بَشَرٌ تَنْتَشِرُونَ (20)} [الروم] واتە: لە نیشانە و بەڵگەکانی خوا ئەوەیە کە ئێوەی لە خاک دروستکردووە،  دوای بڕینی چەند قۆناغێک کتوپڕ بوونەتە مرۆڤێک و بڵاودەبنەوە بە زەویدا.
زانستی نوێ بە شیکاریی جەستەی مرۆڤ سەلماندوویەتی کە لەشی لەھەمان توخمەکانی خاک پێکھاتووە، لەبەرئەوە ئەو زاتەی زەوی لەدوای مردنی دەژێنێتەوە، بێگومان مردووەکانیش لەڕۆژی قیامەتدا زیندوو دەکاتەوە.
بەمجۆرە کشتوکاڵ دەبێتە بەڵگەیەکی ماددیی لەسەر زیندووبوونەوەی دوای مردن.