ماڵپەری قورئانی پیرۆز

نووسینی /ناصح ابراهیم سازانی

پێویستە لەسەر ھەموو مرۆڤێکی ھۆشیار بیربکاتەوە و لە خۆی بپرسێت: سەرەتا گەردوون چۆن دەستی پێکردووە؟ بەدیھێنەری کێ بوو؟ من کێم و بۆچی بەدیھاتووم؟ ئەرک و فەرمانم چییە لەم سەر زەوییەدا؟ پەیام و بەرنامەم چییە لە ژیاندا؟        

                                                              
    ھەرکە مرۆڤ بیرو ھۆشی کردەوە ئەم پرسیارانە دێن بە مێشکیدا, داوای وەڵامێکی شیاوی لێدەکەن, بۆیە پێویستە بیرو ھۆشی خۆی بخاتەگەڕ بۆ وەڵامی ئەم پرسیارە گرنگانەو بگەڕێت بەدوای وەڵامێکی گونجاودا بۆیان, چونکە زۆر شورەییە بۆ مرۆڤ کە خوای گەورە بیرو ھۆشی داوەتێ بەڵام ئەو نەیخاتەگەڕو بیرێ نەکاتەوە لە سەرەنجامی خۆی, بەبێ ئاگایی وەک ئاژەڵ بژی بۆ خواردن و خواردنەوە و رابواردن, ھیچ شتێک نەزانێت دەربارەی نەفس و کارو بارو فەرمانی خۆی, تا لە ناکاو مردن یەخەی پێدەگرێت, ئەو کاتە پێشوازی لە سەرەنجامی نادیاری خۆی بکات بەبێ ئەوەی خۆی بۆ ئامادەکردبێ, بەرھەمی تاڵی بێ ئاگایی و لادان لە رێی راست و کارە دزێو و ناڕەواکانی ژیانی کورتی دنیای کۆدەکاتەوە, جا ئەو کاتە پەشیمان دەبێتەوە, کە پەشیمانی دادی نادات و ھیچ فریای ناکەوێ و دەرباز بوونی بۆ نیە, مەگەر کەسێک خوا بۆ خۆی رەحمی پێبکات.                                                                                                                            
   بێگومان ئەو پرسیارانەی کە لە پێشەوە کران ھەر دەبێت وەڵام بدرێنەوە بۆ ئەوەی مرۆڤ بزانێت کێیە و لە کوێوە ھاتووە؟ بۆچی بەدیھاتووە؟ سەرەنجامی بەرەو کوێیە؟ لەدوای تەواوکردنی ئەم تەمەنە کورتە چی روودەدات؟!.