ماڵپەری قورئانی پیرۆز

نووسینی /سه‌روه‌ر حسن /نووسنگه‌ی ته‌فسیر ///خوای گەورە دەفەرموێت:{أَنَّا صَبَبْنَا الْمَاءَ صَبًّا (25) ثُمَّ شَقَقْنَا الْأَرْضَ شَقًّا (26) فَأَنْبَتْنَا فِيهَا حَبًّا (27)} [عبس]واتە: بێگومان ئێمە ئاومان باراندووەتە خوارەوە، چۆن دابارینێک، لەوەودوا زەویمان بۆ لەت لەت کرد بە چەکەرەی ناسکی ڕووەک. ئینجا دانەوێڵەمان تێدا ڕواند.
ئەم ئایەتانە ئاماژە بەوە دەدەن کە لەسەرەتای بەدیھێنانەوە لەسەر زەوی ئاو دەرکەوتووە، لەدوای ئەوە ڕووەک و لە پاشان مرۆڤ بەدیھێنراوە.
زانایانی فەلەک دەڵێن: زەوی بەر لە ملیۆنان ساڵ پێکھاتووە لەدوای جیابوونەوەی لە خۆر، سەرەتا بەشێوەی گازێکی کڵپەسەندوو بووە و پاشان بەھۆی خولانەوەی ئەم بارستە گازییە بەدەوری خۆیدا (لە بۆشایی دەرەوە)، شێوەی گۆیی وەرگرتووە، پاشان بەھۆی دوورکەوتنەوەی ئەم بارستەیە لە خۆر گازەکان ساردبوونەتەوە و ئەوەش ھۆکاری پێکھاتنی ڕووی دەرەوەی بووە کە بە پلەبەندی ڕەقھەڵاتووە. بەوپێیەش کە گازەکان لە ئۆکسجین و ھایدرۆجین پێکھاتوون و ھەر ئەو دوانەش توخمی پێکھێنەری ئاون، لەبەرئەوە لەنێو ئەم بارستە گازییەدا ئاو دروستبوو، پاشان بەھەڵمبوو و بەرزبووەوە و ساردبووەوە، دووبارە بەشێوەی لێزمەباران بۆی گەڕاوەتەوە و داباریوەتە سەری، بەمجۆرە سەرەتا زەوی دروستبووە و پاشان ئاوی لێ دەرچووە و لەدوای ئەوە ڕووەک دروستبووە.