ماڵپەری قورئانی پیرۆز

نووسینی/صباح مجید ///بەپێی لێكۆڵینەوەیەك كە لە رۆژنامەی (هائارتس)ی ئیسرائیلی بڵاوكراوەتەوە، دەركەوتووە كە نوێژی موسڵمانان مەترسی تووشبوون بە نەخۆشی (زەهایمەر) كەم دەكاتەوە. رۆژنامەی (هائارتس) كە بەناوبانگترین رۆژنامەی ئیسرائیلییە، بڵاوی كردۆتەوە كە لە ئاكامی لێكۆڵینەوەیەكی هاوبەشی (ئەمریكی-ئیسرائیلی) ئەوە دەركەوتووە ئەو نوێژەی موسڵمانان ئەنجامی دەدەن مەترسی تووشبوون بە نەخۆشی زەهایمەر بەرێژەی 50% كەم دەكاتەوە. ئەم لێكۆڵینەوەیەش لەلایەن لێكۆڵەرە ئیسرائیلییەكانی سەر بە نەخۆشخانەكانی (شیفا) و (هلل یافا) و زانكۆی (تەل ئەبیب) و زانكۆی (بن جۆربۆن) و بە هاوبەشی لەگەڵ لێكۆڵەرانی ئەمریكی سەر بە زانكۆی (كلیبلند) ئەنجامدراوە. بەپێی لێكۆڵینەوەكەش ئەو نوێژەی كە موسڵمانان ئەنجامی دەدەن كاریگەرییەكی زۆری بەسەر فێربوون لە دامەزراوە پەروەردەییەكان هەیە و ئەمەش دەبێتە هۆی ئەوەی كە مەترسی تووشبوون بە نەخۆشی (لاوازیی یادگە-الژاكرە) كە بە (زەهایمەر) ناسراوە كەم بێتەوە لای ئەوانەی كە نوێژ ئەنجام دەدەن.
لەمبارەوە خانمە پڕۆفیسۆرێكی ئیسرائیلی بەناوی (رفكا ئینزلبرج) دەڵێ: (كەسی نوێژكەر لەمیانی نوێژكردنەوە رێژەیەكی زۆر لە چالاكی رۆشنبیریی و فیكری بەرهەم دەهێنێت و ئەمەش وادەكات كە مەترسی تووشبوون بەنەخۆشی زەهایمەر كەمبێتەوە. شایانی باسە ئەم لێكۆڵینەوەیە لەسەر 892 كەس ئەنجامدراوە كە تەمەنیان لەسەرووی 65 ساڵی بووە و خەڵكی (وادی عارە)ی نێو ناوچەی (هێڵی سەوز)بوون.