ماڵپەری قورئانی پیرۆز

نووسینی /ناصح ابراهیم سازانی///عیبادەت و خواپەرستی گشتی و شاملە هەموو بوارەكانی ژیان سەراپا دەگرێتەوە و رێكیان دەخات, هەر لە ئادابی نان خواردنەوە تا دەگاتە بونیادنانی دەوڵەت و بەڕێوە بردنی, ئاڵ و گۆڕی بازرگانی و مامەڵەكردن, یاسای سزادان, پەیوەندیە نێو دەوڵەتیەكان لە كاتی ئاشتی و جەنگدا.. بەڵام بەداخەوە تا ئێستاش زۆربەی خەڵك وا ئەزانن عیبادەت و خواپەرستی تەنها بریتیە لە نوێژو رۆژوو و حەج و زەكات و, ئەنجامدانی چەند دروشمێكی تری دینی, بەڵێ ئەوانەش لە عیبادەتە گەورە و گرنگەكانن, بەڵام ئیسلام تەنها لەو چوار چێوەیەدا نیە بەڵكو هەموو بوارەكانی ژیان دەگرێتەوە..                                                                                            
   پرسیاریان كرد لە ئیبن تەیمیە دەربارەی ئەم ئایەتە:{يَا أَيُّهَا النَّاسُ اعْبُدُوا رَبَّكُمُ الَّذِي خَلَقَكُمْ وَالَّذِينَ مِنْ قَبْلِكُمْ لَعَلَّكُمْ تَتَّقُونَ (21)} [البقرة] واتە: ئەی خەڵكینە پەروەردگارتان بپەرستن كە ئێوەو ئەوانەی پێش ئێوەشی دروستكردووە بەڵكو بەو پەرستنە خۆتان بپارێزن.
   وتیان: عیبادەت چییە؟ لق و بەشەكانی عیبادەت چین؟. ئەویش فەرمووی: (عیبادەت ناوێكی كۆو گشتییە بۆ هەر كارو كردەوەیەك كە خوای گەورە پێی خۆشبێت و رەزامەندی لە سەربێت, جا چ ئاشكرا بكرێت یان پەنهان وەك: نوێژ, رۆژوو, حەج, زەكات, راستگۆیی, ئەمانەت پاراستن, چاكە كردن لەگەڵ دایك و باوك, بەجێهێنانی مافی خزمایەتی, وەفاداری بۆ بەڵێن و پەیمان, فەرمان بە چاكە و قەدەغەكردنی خراپە, تێكۆشان لە پێناوی خوا, لە دژی مونافیقان و بێباوەڕان, چاكە كردن لەگەڵ دراوسێ, بێ سەرپەرست, هەژار و نەدار, رێبوار, كۆیلە و ژێردەستەكان لە مرۆڤو  گیانداران و بەزەیی هاتنەوە پێیاندا, هەروەها قورئان خوێندن و, دوعاو پاڕانەوە و, زیكرو یادی خواو, وێنەی ئەوانە..).                                                             
   هەروەها ئەمانەش دەگرێتەوە: (خۆشەویستی خواو پێغەمبەرەكەی, ترسان لە خواو, پەشیمانی دەربڕین و زوو زوو گەڕانەوە بۆ لای, نیاز پاكی و دڵسۆزی بۆ دین و بەرنامەكەی, خۆڕاگری و بەردەوامی لەسەر بڕیارو فەرمانەكانی, سوپاس و ستایش كردن لەسەر نازو نیعمەتەكانی, رازی بوون بە قەزاو قەدەر, پشت و پەنا بەستن بە خوا بەتەنها داوای كۆمەك لەو كردن, هیواو ئومێد بەسۆزو بەزەیی, ترسان لە سزاو تۆڵەی و وێنەی ئەوانە..)