ماڵپەری قورئانی پیرۆز

لەم كتێبەدا گرنگترین وتار و توێژینەوەكانی ئیعجازی قورئان و سوننەتی پێغەمبەر (صلى الله عليه‌ وسلم) لە بواری دەروونناسیدا دەخەینە ڕوو. ئەوەی دواتر باسی دەكەین پەیوەندی بە هەریەكەمانەوە هەیە، هەر بۆیە ڕەنگە ئەم كتێبە هۆكاری گۆڕانی گرنگ بێت لای هەندێك لە خوێنەران كە تاهەنووكە زانیاری تەواویان لەسەر ئەم زانستە نەبووە. بەندە گەیشتومەتە ئەو ئاكامەی هەرچی ڕاستیگەلی دروست و دڵنیا هەیە و زانایانی دەروونناس ئاشكرای دەكەن، قورئانی پیرۆز بەر لە چواردە سەدە لەبارەیانەوە دواوە!!

كاری ئێمە وەك باوەڕداران كە بانگەشەی خۆشەویستیمان دەكەین بۆ قورئان، ئەوەیە كە ئەم زانستە بگێڕینەوە سەر بنەما قورئانیەكانی. ئارەزووی ئەوە دەكەین لە باشترین پایەدا بین لای خوا، ڕێگای كارەكەش ئەوەیە شوێن پێی پەیامبەری ڕێنوێنی و بەزەیی هەڵبگرین لە جوڵە و هەڵسوكەوت و ڕێگای چارەكردنی كێشەكان و شێوازی مامەڵەی لەگەڵ دەوروبەریدا. لەخوای گەورە داواكارین بمانكاتە ئەو كەسانەی لەبارەیانەوە دەدوێت و دەفەرموێت:

{أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ (157)} [البقرة] واتە: ئا ئەوانە چەندەها ستایش و ڕەحمەت و میهرەبانی هەر بەسەر ئەواندا دەبارێت لەلایەن پەروەردگاریانەوە و ئەوانە ئەو كەسانەن كە ڕێبازی هیدایەتیان گرتووە.