ماڵپەری قورئانی پیرۆز

هەرگیز یەكێك لەو ئایەتانە لەیاد ناكەم كە دواتر لە ژوورەكەمدا هەڵمواسی، دەفەرموێت:{وَإِنْ يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ وَإِنْ يُڕدْكَ بِخَيْرٍ فَلَا رَادَّ لِفَضْلِهِ يُصِيبُ بِهِ مَنْ يَشَاءُ مِنْ عِبَادِهِ وَهُوَ الْغَفُورُ الرَّحِيمُ (107)} [يونس] واتە: (ئەی مرۆڤ) ئەگەر خوا تووشی ناخۆشی و زیانێكت بكات هیچ كەس ناتوانێت فریات بكەوێت و لەسەرتی لابەرێت جگە لەو زاتە، یاخود ئەگەر بیەوێت توشی خێر و خۆشیەكت بكات. هیچ كەس ناتوانێت بەری فەزڵ و بەخششی خوا بگرێت، هەركام كە بیەوێت لە بەندەكانی بەهرەوەر دەكات ( لە ناز و نیعمەتانی بێشومار) ئەو زاتە هەمیشە لێخۆشبو و میهرەبانە.

خوێنەری بەڕێز! ئەم ئایەتە پتر لە (90%)ی خەم و خەمۆكی و دڵەڕاوكێ‌ و ترس و ڕاڕایی لە مندا چارەسەر كرد!! بەڵام ئەمە چۆن؟

شتگەلێكی زۆر هەن دەبنەهۆی خەم و خەمۆكی، ئەو بێئومێدی و تێكشكانەی مرۆڤ هەندێجار ڕووبەڕوویان دەبێتەوە لە ئاكامی شكستی لەكارێكدا، یان هەڵەی لە هەڵسوكەوتێكدا یاخود پەلەكردنی لە وتنی وشەیەكدا كە دواتر ئاشكرا دەبێت هەڵەیە، یان ئەنجامی كەوتنی لە تاقیكردنەوە یا شكستهێنانی لە پەیوەندی سۆزداریدا.

كاتێك فێربووم كە هەر زیانێك توشم دێت لە خوای پەروەردگارەوەیە، بەر لە بەدیهێنانم دیاریكراوە، كەس ناتوانێت ئەو زیانە ئاشكرا بكات و لێم دووربخاتەوە خوای پەروەردگار نەبێت، دەموت: ئیدی بۆچی من خەمبار و نیگەران و بێئومێدم؟ ئەگەر خوای پەروەردگار، كە بەخشندەترینی بەخشندەكانە، توشی ئەم زیانەی كردووم و هەر خۆیەتی ئەو زیانە ئاشكرا دەكات، ئایا شتێكی لەوە جوانتر هەیە؟! 

ئەم قەناعەتە نوێیە شتگەلێكی زۆری لە ژیانمدا گۆڕی، ئەو كاتەی لە بیركردنەوەم لە هەڵە و كێشەكانی ڕابردوو بەسەرم بردبوو، ئیدی گۆڕا بۆ كاتێكی كارا كە تیایدا قورئانم دەخوێند یان شتێكی نوێی زانستی تێدا فێر دەبووم! لەگەڵمدا تەماشای ئەم وشانە بكە:چۆن ئەم وشانە تەواوی ژیانی مرۆڤێكی گۆڕی، چۆن كاتیشی لە كاتێكی بەهەدەرچووەوە بۆ كاتێكی بەرهەمدار و كارا گۆڕا!

بەڵام چی دەربارەی بەشی دووەمی ئایەتەكە؟ئەم وشە لێوان لە سۆز و گەشبینی و زیندوویەتیە زۆر شتی لە مندا گۆڕی... لە زۆربەی كاتەكاندا گرفتاری دڵەڕاوكێ‌ و ترس بووم دەربارەی ئەو شتانەی ڕوویاندەدا یاخود خەیاڵم دەكرد ڕوودەدەن، وەك پێشبینی شكست لە كارێكدا یان پێشبینی هەڵە لە هەڵسوكەوتێكدا، لە كردنی هەموو كارەكاندا دوودڵ دەبووم: ئایا ئەنجامی بدەم یان نا؟!

كاتێكك ئەم وشە ئیلاهیانەم خوێندەوە تێگەیشتم هەر خێرێك توشم دێت ناكرێت لە دەرەوەی ویستی خواوە بێت! حاڵی بووم هەر خێر و چاكەیەك كە دێت، كەس ناتوانێت بیگێڕێتەوە یان لێمی دووربخاتەوە جگە لە خوای پەروەردگار!

وتم ئەگەر خێر و چاكە هەمووی لای خوای باڵادەستە، ئیدی بۆچی من نیگەران بم و بترسم؟ ئەگەر شتێك هەیە و دەمەوێت پێی هەڵسم و دەربارەی ئاكامەكانی نیگەرانم، دەشزانم ئاكامەكان بەدەستی پڕ دەسەڵاتی خوان، هەر ئەو زاتە خێر و چاكەم دەداتێ‌ و كەس ڕێگریم لێناكات، كەواتە ڕاڕایی لە كردنی ئەم كارەدا بۆچی؟ مادام مەسەلەكە خێرە و ڕەزامەندی پەروەردگاری تێدایە. 

لە ئەنجامدا ئەم ئایەتە لە لەناوبردنی ڕاڕایی و ترس و نیگەرانیمدا بەشداری كرد، ئەم وشە ڕەببانیانە گۆڕانیان لە ڕەفتاریشمدا دروستكرد. ئیتر هەژماركردنی زۆری بەر لە كردنی كارەكانم نەما، ئەمە مانای گەڕانەوەی كاتە، وایلێهات كاتێكی زۆرم هەبوو كە دەمتوانی لە گەشەپێدانی مەعریفە و زانیاریمدا سوودیان لێوەربگرم.

ئەمە بەشی سێیەمی ئایەتە پیرۆزەكەیە، واتە خوای پەروەردگار خەڵكێك (لەوانەی دەیەوێت) هەڵدەبژێرێت تاكو توشی خێریان بكات... كەواتە چۆن بتوانم وابكەم پەروەردگار توشی ئەو خێرەم بكات؟ بەر لە هەر شت پێویستە پەیوەندیم لەگەڵ خوای پەروەردگاردا باش بكەم.

یەكەمین هەنگاوی چاككردنی پەیوەندی لەگەڵ خودا ئەوەیە بە دڵسۆزی تەواوەوە ڕووەو خوا بڕۆیت بەبێ‌ ئەوەی هیچ بەرژەوەندییەكت هەبێت جگە لە ڕەزامەندی ئەو.

لەوكاتەدا بە ئاكامێك گەیشتم: ئەم ئایەتە (وێڕای كورتی وشەكانی) لێوانە لە ڕێنمایی كە بەتەواوی ڕەفتاری مرۆڤ دەگۆڕێت. ئەم ئایەتە دووبارە بەرنامەڕێژكردنی مێشك و گۆڕینیی زانیارییە زەخیرەكراوەكانیەتی لە زانیاریگەلێك كە ڕاڕایی و ترس و نیگەرانی دەستی بەسەردا دەگرێت بۆ زانیاریگەلێك كە لێوانە لە هێز و گەشبینی و دڵنیایی. 

خۆشەویستانم! هەنووكە دەڵێم:

دەبێت بزانین باشترین و كورتترین ڕێگای دووبارە بەرنامەڕێژكردنەوەی مێشك بریتییە لەوەی بە خوێندنەوەی چەند ئایەتێكی قورئانی پیرۆز دەست پێبكەیت، بڕیاری لەبەركردنی قورئان بدەی بەبێ‌ بیركردنەوە لە سەركەوتن یان شكست لەوكارەدا، تۆ تەنها بڕیاربدە و ئاوڕ مەدەوە لەو ڕێنماییە سەلبیانەی شەیتان لەسەر تۆ مومارەسەی دەكات، تەنها بڵێ‌: " من بەنیازم ئەم قورئانە لەبەربكەم، كار بۆ ئەوە دەكەم و لەخوا دەخوازم پشتیوانم بێت". ئەم پەیامە بەر لە نووستن و دوای بێداربوونەوە دووپات بكەرەوە.

من متمانەی تەواوم هەیە قورئان لەبەر دەكەیت (هەر ئەوە لە من ڕوویدا- نووسەر) ، پاشتر گۆڕانی گەورە لە ژیانتدا دەبینیت لە ئاكامی ئەم لەبەركردنەوە، هەروەها دەبینیت چۆن هەستەكانی ترس و نیگەرانی و ڕاڕایی و خەم دەست بە پوكانەوە دەكەن و هەستەكانی گەشبینی و دڵنیایی و كامەرانی و سەركەوتن جێیان دەگرنەوە.

هەر كە دەست بە لەبەركردن دەكەیت دەبینیت چۆن توانا زەینیەكانت گەشە دەكەن، چۆن زاكیرەت بە سەد هێندە باشتر دەبێت، چۆن بەتواناتر دەبیت لە مامەڵەكردن لەگەڵ ئەوانی دی، بەڵكو زیاتر متمانەیان بەدەست دێنیت. دواتر خۆت دەبینیتەوە توانستی پترت هەیە لە قسەكردن بۆ خەڵك و بەتواناتر لە گوزارشتكردن لەوەی دەیخوازیت بەوپەڕی سادە و ئاسانی (ئەمەش لە من ڕوویدا)!