ماڵپەری قورئانی پیرۆز

خودای مەزن لەم فەرمایشتانەوە ئەوە رادەگەیەنێت كە بەشێوازی پەروەردگارێتیی مسۆگەركاری خۆی موسای پاراستوە‌و مەترسیی فیرعەونی لەسەر لابردووە. بەڵام مانای سروشی خودا(وحی الله) بۆ دایكی موسا چی یە؟! بێگومان ئەوە سروشێكی وەك پەیام ناردن نەبووە، واتە لەرێگەی (جیبریل)ی فریشتە وجێ‌ی متمانەی خوداوە نەبووە، چونكە دایكی موسا پێغەمبەر‌و رەوانەكراوی خودا نەبوە، پێغەمبەرێتیش لەنێو ژناندا دەرنەكەوتووە، بەڵكو ئەو كارە تەنها بە پیاوان سپێرراوە‌و قورئانیش بەڕاشكاوی ڕایگەیاندووە: واتە: (ئەی پێغەمبەر، ئێمە لەپێش تۆشدا سروشـمان بۆ پیاوانێك ناردووەو كردوومانن بە پێغەمبەران، جا ئەگەر (بێ‌باوەڕان‌و خەڵكی دی) نازانن‌و بڕوا ناكەن با پرسیار لە شوێنكەوتوانی كتێبە ئاسـمانییەكانی تری وەك (ئینجیل)‌و (تەورات) بكەن تاكو بزانن).

(جیبریل) فریشتەی خودا-سڵاوی لێبێت- تەنها بۆ پێغەمبەران‌و نێرراوانی خودا سرووشی هێناوەتە خوارەوە، جا لەبەر ئەوەی دایكی موساش پێغەمبەرێك نەبووە ئەوا سرووشەكەی خوداش بۆ ئەم ژنە لە رێگەی (جبریل)ەوە نەبووە. بەڵكو (والله أعلم) لەرێگەی ئیلهام‌و نیگای خۆیی(فطری)یەوە بووە بەئیلهام‌و نیگایەكی (فیطری) خودا تێ‌ی گەیاندووە كە بەو شێوەیە هەڵس‌وكەوت بكات، واتە شیری پێ‌بدات‌و لەنێو سندووقێكدا هەڵیداتە رووبارەكەوە. 

نیگای (فیطری)یش بۆ مرۆڤ وەك زانایانی (زانستەكانی قورئان) دەڵێن: شێوەیەكە لە شێوە زمانەوانییەكانی سرووش).