ماڵپەری قورئانی پیرۆز

لەم بانگەوازەدا خوای گەورە فەرمان بە بێهیواكان دەكات كە هەرگیز ئومێدیان بە ڕەحم و بەزەیی خوا لەدەست نەدەن، هەواڵیان دەداتێ‌ تاوانەكان و شكست و سەرپێچیەكان و سەرجەم جۆرەكانی زیادەڕۆیی كە ئەنجامیان داوە، خوای گەورە لە چاوتروكانێكدا دەیانسڕێتەوە بە مەرجێك كەسەكە بە دڵێكی ساغ و تەندروستەوە بۆلای خوا بگەڕێتەوە.

دواتر لەو سزایە ئاگاداریان دەكاتەوە كە ئەگەر پەشیمان نەبنەوە، ڕووبەڕوویان دەبێتەوە.

ئایەتی یەكەم هەواڵی ئیجابی دێنێت و ئایەتی دووەم هەواڵی سەلبی، ئایەتی یەكەم دەربارەی لێخۆشبوون و بەزەیی خوا و بێئومێد نەبوون دەدوێت: ئایەتی دووەمیش ئاگاداری دەدات لە سەرەنجامی نەگەڕانەوە بۆلای خوا كە سزای خوایی بەدوادا دێتت

ئایەتەكانی دواتر وێنای ئاكامی كارە سەلبیەكانمان بۆ دەكەن ئەگەر هاتوو لەسەریان ماینەوە، فەرمانمان پێدەدات دەمودەست بیانگۆڕین. پەروەردگار دەفەرموێت: {وَاتَّبِعُوا أَحْسَنَ مَا أُنْزِلَ إِلَيْكُمْ مِنْ رَبِّكُمْ مِنْ قَبْلِ أَنْ يَأْتِيَكُمُ الْعَذَابُ بَغْتَةً وَأَنْتُمْ لَا تَشْعُرُونَ (55)} [الزمر] واتە: بەردەوام شوێنی چاكترینی ئەو فەرمانانە بكەون كە لەلایەن خواوە ڕەوانەكراوە بۆتان، پێش ئەوەی سزا و ئازاری كتوپڕ یەخەتان پێبگرێت و لەكاتێكدا كە ئێوە هەست بە نزیكی سزاكە ناكەن. 

خوێنەری خوشەویستم! لەگەڵمدا لە فەرمانی ئیجابی ڕابمێنە: بەدوایدا ئاكامی سەلبی ئازاربەخش دێت بۆ كەسێك كە فەرمانی پەروەردگار جێبەجێ‌ ناكات

لەپاشان لەو چەند ئایەتەی دواتردا قۆناغی وێناكردنی ئاكامەكانی كاری سەلبی دێت، ئەم ئایەتە پیرۆزانە ئەگەرە جیاوازەكانی ئاكامە سەلبیەكانمان بۆ وێنا دەكەن كە بەدڵنیاییەوە ڕوودەدەن ئەگەر هاتوو وەڵامدانەوەمان بۆ ئەو گۆڕانە ئیجابیە نەبێت كە قورئانی پیرۆز فەرمانمان پێدەدات، پەروەردگار دەفەرموێت:{أَنْ تَقُولَ نَفْسٌ يَا حَسْرَتَا عَلَى مَا فَرَّطْتُ فِي جَنْبِ اللَّهِ وَإِنْ كُنْتُ لَمِنَ السَّاخِڕينَ (56) أَوْ تَقُولَ لَوْ أَنَّ اللَّهَ هَدَانِي لَكُنْتُ مِنَ الْمُتَّقِينَ (57) أَوْ تَقُولَ حِينَ تَرَى الْعَذَابَ لَوْ أَنَّ لِي كَرَّةً فَأَكُونَ مِنَ الْمُحْسِنِينَ (58) بَلَى قَدْ جَاءَتْكَ آيَاتِي فَكَذَّبْتَ بِهَا وَاسْتَكْبَرْتَ وَكُنْتَ مِنَ الْكَافِڕينَ (59) وَيَوْمَ الْقِيَامَةِ تَرَى الَّذِينَ كَذَبُوا عَلَى اللَّهِ وُجُوهُهُمْ مُسْوَدَّةٌ أَلَيْسَ فِي جَهَنَّمَ مَثْوًى لِلْمُتَكَبِّڕينَ (60)} [الزمر] واتە: نەوەكو یەكێك بڵێت: ئاخ و داخ و پەشیمانی بۆ ئەو هەموو لادان و نادروستیانەی كە كردم، لە فەرمان و بەرنامەی خوادا، بێگومان لەو كەسانەش بووم كە گاڵتەیان بە ئاین و بەرنامەی خوا دەكرد. یاخود بڵێت: ئەگەر بەڕاستی خوا هیدایەت و ڕێنمویی بكردمایە، ئەوە من لە ڕیزی پارێزكاران و چاكاندا دەبووم!! یاخود كاتێك كە سزا و ئازار دەبینێ‌ بڵێت: خۆئەگەر بێگومان مۆڵەتێك ببێت جارێكی تر بگەڕێمەوە بۆ دونیا، ئەوە مەرج بێت لە چاكەكاران بم. نەخێر وانییە، مۆڵەت بەسەرچوو، چونكە بەڕاستی كاتی خۆی ئایەت و فەرمانی منت بۆهات، كەچی تۆ ئەو كاتە بڕوات پێنەكرد و بە درۆت دەزانی، فیز و دەمارگیریت دەكرد و لوتت هەڵدەبڕی لەئاستیدا، تۆ هەر لەڕیزی بێبڕواكاندا بوویت. جا ڕۆژی قیامەت دەبینیت، ئەوانەی درۆیان بەناوی خواوە دەكرد ڕووخساریان ڕەش و تاریكە، مەگەر شوێن و جێگا بۆ ئەو خۆبەزلزان و لوتبەرزانە لە ئاگری دۆزەخدا نییە؟!

ئەم ئایەتانە وێناگەلێك لەخۆ دەگرن كە دەكرێت ڕووبدەن،ئاكامێكی سەلبیە حەسرەت و پەشیمانی لەخۆدەگرێت. بەگۆڕینی دەستبەجێ‌. ئاكامێكی سەلبیە خەونگەلێك لەخۆدەگرێت كە هێشتا بەدی نەهاتوون: ئاكامێكی سەلبیە خۆزگەی گەڕانەوە بۆ ڕابردوو لەخۆدەگرێت، بەڵام هەرگیز ڕوونادات.

باشە چی دەبێت ئەگەر وەڵامدانەوەمان بۆ بەرنامە قورئانیەكە هەبوو و ئەوەی پەروەردگار فەرمانمان پێدەكات جێبەجێمان كرد، تەماشای ئەم ئایەتەی دواتر بكە كە ئاكامە ئیجابیە مەزنەكانی ئەو ڕۆژەی بۆ وێنا كردووین:{وَيُنَجِّي اللَّهُ الَّذِينَ اتَّقَوْا بِمَفَازَتِهِمْ لَا يَمَسُّهُمُ السُّوءُ وَلَا هُمْ يَحْزَنُونَ (61)} [الزمر] واتە: خوای گەورە ئەوانە ڕزگار دەكات كە دینداری و پارێزكاریان دەكرد، بەهۆی سەركەوتن و دەرچوونیان لە تاقیگەی دونیادا، ئیتر هیچ جۆرە ناخۆشیەكیان توش نایەت و دڵگرانیش نابن