ماڵپەری قورئانی پیرۆز

{ثُمَّ خَلَقْنَا النُّطْفَةَ عَلَقَةً فَخَلَقْنَا الْعَلَقَةَ مُضْغَةً فَخَلَقْنَا الْمُضْغَةَ عِظَامًا فَكَسَوْنَا الْعِظَامَ لَحْمًا ثُمَّ أَنْشَأْنَاهُ خَلْقًا آخَرَ فَتَبَارَكَ اللَّهُ أَحْسَنُ الْخَالِقِينَ (14)} [المؤمنون]، واتە: لەوەودوا نوتفەكەمان كردووە بە خۆهەڵواسەرێك، پاشان خۆهەڵواسەرەكەمان كردووە بە گۆشتپارەیەك ، ئینجا (شێوازی) گۆشتپارەكەمان بە پەیكەری ئێسك گۆڕیوە و بەگۆشت پەیكەری ئێسكەكەمان داپۆشیوە، ئەوسا لەشێوەیەكی تردا دەرمانهێناوە. بەڕاستی خوای مەزن بەرز و پیرۆز و موبارەكە و چاكترین بەدیهێنەر و چاكترین دروستكارە.

پسپۆڕەكانی زانستی كۆرپەلەزانی (ئەو زانستەی لێكۆڵینەوە و بەداداچوون بۆ گەشەكردنی كۆرپەلە دەكات لە منداڵدانی دایكدا) تا ماوەیەكی نزیك وەهایان دانابوو ئێسك و ماسولكەكان لەیەككاتدا دروستدەبن. لەبەر ئەم هۆیە و بۆ ماوەیەكی درێژیش هەندێكجار خەڵك پڕوپاگەندەی ئەوەیان دەكرد كە ئەم ئایەتە دژە لەگەڵ ڕاستییە زانستییەكاندا، بەڵام توێژینەوە مایكرۆسكۆبیە پەرەسەندووەكان كە توانراوە بەهۆی پێشكەوتنی تەكنەلۆژیاوە ئەنجام بدرێن ئەوەیان ئاشكراكرد كە نیگا (وەحیە) قورئانییەكە تەواو ڕاست و دروستە.

ئەو توێژینەوە مایكرۆسكۆبییانە سەلماندیان كە گەشەسەندنی كۆرپەلە لەناو منداڵدانی دایكدا بەتەواوی وەك ئەوەیە كە ئایەتەكانی قورئان وەسفیان كردووە. یەكەمجار شانەی كڕكڕاگەیی دروست دەبێت و دەگۆڕێت بۆ ئێسكی كۆرپەلە، پاشان لەدوای ئەوە خانەكانی ماسولكە دروستدەبن كە دەكەونە نێوان شانەكانی دەوری ئێسك، پاشان لەگەڵ یەك كۆدەبنەوە و پێكدێن بۆ ئەوەی دەوری ئێسك بدەن. 

بڵاوكراوەیەكی زانستی لەژێر ناونیشانی (تكون اڵانسان – دروستبوونی مرۆڤ) و لە كتێبی (Embrology with Islamic edition) سەرجەم بابەتەكە بەمجۆرە ڕاڤە دەكات: "لەماوەی هەفتەی حەوتەمدا ئێسكەپەیكەر بە لەشدا دەست بەبڵاوبوونەوە دەكات و ئێسك شێوە ئاساییەكەی وەردەگرێت. لە كۆتایی هەفتەی حەوتەم و لەماوەی هەفتەی هەشتەمدا ماسولكەكان دۆخی خۆیان بەدەوری ئێسكەكاندا وەردەگرن". 

بەكورتی باسەكانی قورئانی پیرۆز بۆ قۆناغەكانی دروستبوونی كۆرپەلە بەتەواوی لەگەڵ دوزینەوەكانی زانستی كۆرپەلەزانی نوێدا تەبان.