ماڵپەری قورئانی پیرۆز

قورئانی پیرۆز باسی هیچ لایەنێكی تری ژیانی دایكی موسای نەكردووە تەنها ئەو لایەنە نەبێت كە پەیوەستە بە كاتی منداڵیی موساوەـ سڵاوی خوای لێبێ‌ ـ. دوایین ساتی چیرۆكی ئەم دایكەش لە قورئاندا هەر ئەوەیە كە كوڕەكەی بۆ لای دەگەڕێتەوە، بەڵام بەپێ‌ی بڕیاری فیرعەون‌و لەسەر ئەركی داراییی فیرعەونیش بەخێو بكرێت، ئیدی ئەویش شیری پێ‌دەدات‌و بایەخی پێ‌دەدات بەپێ‌ی ئەو هەل‌و مەرجەی بۆی دەڕەخسێت.

ئەی ئاخۆ دوای ئەمە چی مابێت؟! ئایا شتێكی وا لە ژیانی ماوە كە پەیوەندیی بە منداڵێتیی موساوە مابێت‌و كە شایستەی باسكردن بێت؟ نەخێر شتێكی وا نەماوە.. هەربۆیەش قورئان دوای ئەم دیمەنە لەباسی ئەم ژنە وەستاوەو بەو ساتە وەختە كۆتاییی بەباسی دایكەكە هێناوە. ئەمەش كۆتایی پێ‌هێنانێكی هونەری‌و بابەتیانەیە. ئێمەش دەبێت لەكوێ‌دا قورئان كۆتایی بە باسێك دێنێت لەوێ‌دا بوەستین‌و كۆتاییی پێ‌ بێنین. هەروەها بێ‌دەنگ بین لەئاست شتێكدا كە قورئان لەئاستیدا بێ‌دەنگ بووەو هێندە بەس بێت كە قورئان پێشكەشی كردووین.

هەر كەسێكیش بەو بڕە باسكردنەی قورئان قەناعەت نەكات، خوداش قەناعەتی پێ‌ناكات.. هەركەسێكیش بەوەندەی قورئان باسی كردووە تێر نەبێت، خوداش تێری ناكات.

بێگومان قورئان لە گێڕانەوەی لایەنەكان‌و قۆناغی هەر چیرۆكێكدا پوختەیەكی خێرای لێ دەهێنێت، بۆ نموونە باسی موسامان لەكاتی گەنجییدا كە پێگەیشتووە بۆ دەكات‌و چەند قۆناغێكی ژیانیشی هەر لەوێ‌دا دەپێچێتەوە، لەكاتی منداڵیشیدا‌و دوای شیرخواردنی قۆناغێكی ژیانیمان بۆ دەپێچێتەوە، هەروەها لەكاتی باسكردنی قۆناغی مێردمنداڵیدا كە نەوجەوانێكی پێگەیشتووە بەشێكی تری ژیانیمان لەو شوێنەدا بۆ دەپێچێتەوە، ئەمەش لەبەر ئەوەی ئەو دیمەنانە بۆ چیرۆكەكەی پێویست نین.. بەڵكو ئەوەی پێویست‌و گرنگ بێت لەدوای منداڵیی موسا-سڵاوی لێبێت- ئەو گەنجێتییە پڕ لە جۆشی ژیان‌و زیندوێتی‌و حەماسەت‌و ئازایەتی‌و ئیمان‌و دڵسۆزی‌و خۆشەویستییەیە كە تیایدا بەرگریی لە مەزڵومان كردووەو پشتگیری لاواز‌و بیدەسەڵاتانی كردووە، وەك خودا لەبارەیەوە فەرموویە:واتە: (دوای ئەوەی موسا تەمەنی گەشتە رادەی ئەوەی كە لە ڕووی تێگەیشتن‌و لاشەوە بەهێز‌و توانا بێت، ئێمە حیكمەت‌و دانایی‌و زانست‌و زانیاریمان پێ‌بەخشی، هەر بەو شێوەیە پاداشتی چاكەكاران دەدەینەوە.. موسا لەكاتی غەفڵەتی خەڵكی شاردا خۆی كرد بە كووچە‌و بازاڕدا‌و بینیی دوو پیاو شەڕ دەكەن، ئەمەیان لە هۆزەكەی خۆیەتی‌و ئەوی تریشیان لە هۆزی دوژمنەكەیەتی كە هۆزی فیرعەونە، جا ئەوەی كە لە هۆزەكەی بوو هانای بۆ هێنا‌و داوای لێكرد فریای بكەوێت‌و لەو شەڕەدا لایەنی بگرێت، موساش بە پەلە بەهانایەوە چوو‌و یەك بۆكزی كێشا بە كابرای دوژمندا‌و كوشتی).

ئێمە لێرەدا ناچینە نێو شیكار‌و قوڵایی ئەم بەسەرهاتانەوە تاكو لە ناوەرۆك‌و بابەتی ئەم كتێبەمان دەرنەچین، چونكە باس‌و خواسی ئێمە تەنها لەمەڕ دایكی موسایە نەك لەمەڕ خودی موسا-سڵاوی لێبێت-، هەر ئەوەشمان لەو چیرۆكە باس كردووە كە تەنها پەیوەندی بە چیرۆك‌و بەسەرهاتی دایكیەوەیەتی.