ماڵپەری قورئانی پیرۆز

هەندێك لە مێژوو نووسان‌و زانایان گوتوویانە كە (ئەو پیاوە ئامۆزای فیرعەون بووە‌و ئیمانی خۆی شاردۆتەوە لە ترسی ئەوەی نەبادا فیرعەون ئازاری بدات)، بەڵام لە دیاریكردنی ناوەكەشیدا وتە‌و بیروڕای هەمە جۆریان هەیە، هەندێكیان وای بۆ دەچن كە ناوی (شەمعوون) بوو بێت، هەندێكیشیان دەڵێن ناوی (خەیر) بووە، هەندێكی تریشیان دەڵێن ناوی (جەبرەك) بووە، گوتراویشە ناوی (شەمعان) بووە‌و، هەروەها گوتراوە ناوی (حەبیب) بووە، زۆر لە زانایانیش ڕایان وایە كە ناوی (حەزفیل)بوو بێت. 

زانا (الثعلبـی) لە كتێبی (عرائس المجالس)دا بەشێك لە چیرۆكی ئەم پیاوەی هێناوە‌و، گوتوویەتی: (ئەم پیاوە لە هاوڕێیانی فیرعەون بووە‌و، دارتاش بووە‌و هەر ئەویش سندووقەكەی بۆ دایكی موسا دروست كردووە كاتێك موسای لێ بووە‌و هەڵیداوەتە دەریاكەوە، گوتراویشە گەنجینەدار‌و بەرپرسی گەنجینەی فیرعەون بووە‌و ماوەی سەد ساڵ ئەم كارەی بۆ كردووە، ئیمانیشی دەرنەخستووە تەنها دوای ئەو كاتە نەبێت كە خودای مەزن (مووسا) بەسەر سیحربازەكان دا سەردەخات، كاتی لەناو چوون‌و كۆتایی ژیانیشی لەگەڵ لەناوچوونی سیحربازەكان دابووە كە ئەوە بوو فیرعەون هەموویانی لەگەڵ ئەم پیاوەش دا گرتووە‌و لە خاچی داون‌و ئەم پیاوەشی وەك ئەوان كوشتووە، هاوسەری ئەم پیاوە قژ داهێنەر(ماشطە)ی كچی فیرعەون بووە‌و ئافرەتێكی ئیماندار بووە وەك مێردەكەی، فیرعەون ئەم هاوسەرەشی گرتووە‌و دوای كوشتنی مێردەكەی، ئەویشی لەگەڵ منداڵەكانی دا كوشتووە)