ماڵپەری قورئانی پیرۆز

یان دەفەرموێت:{وَمِنْ آيَاتِهِ أَنَّكَ تَرَى الْأَرْضَ خَاشِعَةً فَإِذَا أَنْزَلْنَا عَلَيْهَا الْمَاءَ اهْتَزَّتْ وَرَبَتْ إِنَّ الَّذِي أَحْيَاهَا لَمُحْيِي الْمَوْتَى إِنَّهُ عَلَى كُلِّ شَيْءٍ قَدِيرٌ (39)} [فصلت] واتە: لە بەڵگە و نیشانەكانی خوا ئەوەیە كە دەبینیت زەوی كش و ماتە، جا كاتێك باران بەسەریدا دەبارێنێت دەخرۆشێت و گەشە و نەشونما دەكات، چونكە بەڕاستی ئەو زاتەی كە زەوی زیندووكردەوە، مردوانیش زیندوو دەكاتەوە، بێگومان ئەو خوایە دەسەڵاتی بەسەر هەموو شتێكدا هەیە. 

كشتوكاڵ كردارێكە بەهۆیەوە مرۆڤ پیشانی خۆی دەدات چۆن خوای مەزن زەوی لەدوای مردنی بە ئاو زیندوودەكاتەوە، كاتێك وشك و زەرد هەڵگەڕابوو و هەنووكە لێوانلێوانە لە ژیان و زیندەوەران، بەوجۆرە مرۆڤ بەچاوی خۆی هەندێك دیاردە و توانای خوا دەبینێت لە بەدیهێنانی ژیان لە زەوی مردووەوە. مرۆڤیش لە خاكی زەوی بەدیهێنراوە، وەك پەروەردگار دەفەرموێت:{وَمِنْ آيَاتِهِ أَنْ خَلَقَكُمْ مِنْ تُرَابٍ ثُمَّ إِذَا أَنْتُمْ بَشَرٌ تَنْتَشِرُونَ (20)} [الروم]واتە: لە نیشانە و بەڵگەكانی خوا ئەوەیە كە ئێوەی لە خاك دروستكردووە،  دوای بڕینی چەند قۆناغێك كتوپڕ بوونەتە مرۆڤێك و بڵاودەبنەوە بە زەویدا.

زانستی نوێ‌ بە شیكاریی جەستەی مرۆڤ سەلماندوویەتی كە لەشی لەهەمان توخمەكانی خاك پێكهاتووە، لەبەرئەوە ئەو زاتەی زەوی لەدوای مردنی دەژێنێتەوە، بێگومان مردووەكانیش لەڕۆژی قیامەتدا زیندوو دەكاتەوە. 

بەمجۆرە كشتوكاڵ دەبێتە بەڵگەیەكی ماددیی لەسەر زیندووبوونەوەی دوای مردن.