ماڵپەری قورئانی پیرۆز

لە سوورەتی (غافر) یان (مۆمن)دا شیكاری چەند قۆناغێكی بەسەرهاتی (موسا) باس نەكراوە وەك هاتنی بۆ (مەدیەن)‌و، ئاخاوتنی خودا لەگەڵیدا لەلای چیای (گور)دا‌و، هەردوو بەڵگە ڕۆشنەكەی گۆچانەكەی‌و، دەستە سپییەكەی‌و، داواكاریی خودا لە موسا‌و هارون لەسەر ڕۆشتن بۆ لای فیرعەون‌و گەلەكەی‌و بانگكردنیان بۆ سەر ڕێبازی خودا‌و دەست هەڵگرتنیان لە چەوساندنەوەی (بەنو ئیسرائیل)‌و سەربەست كردنیان، سوورەتەكە ئەم لایەنانەی چیرۆكەكە‌و شیكاری بەرەنگاربوونەوەی (موسا) لەدژی (فیرعەون)‌و دیمەنەكانی بەربەرەكانی‌و كێبەركێی نێوان موسا‌و سیحربازەكان‌و، باوەڕهێنانی سیحربازكان‌و دان بەخۆ داگرتنیان‌و، دەرچوونی موسا لەگەڵ گەلەكەیداو گەیشتنەوەی فیرعەون پێیان‌و، ڕزگاربوونی موسا‌و گەلەكەی‌و تیا چوونی فیرعەونی باس نەكردووە، (بەڵكو ئەمانە هەمووی لە سوورەتەكانی تردا باسكراون)، بەڵام لەم سوورەتەدا تەنها گرنگی بە دەرخستنی هەڵوێستی پیاوە باوەڕدارەكە دراوە، چونكە هەر خۆی خانەی مەبەستە تیایدا.

ڕوانینێكی هونەری بۆ بڕگەكانی ئەم دیمەنە:

دیمەنی یەكەم ئەم بڕگانەی لە خۆ گرتووە:-

1- لە بڕگەی یەكەم دا:- هەرسێ ستەمكاری لە ستەم ڕۆچوو (فیرعەون‌و هامان‌و قارون) لەسەر شانۆی حوكم‌و فەرماندان سەر گەرمی فەساد‌و ستەمی زۆر لە جەماوەران.

2- لە بڕگەی دووەم: (موسا) دروودی خودای لێ بێت- دێتە لای هەرسێ ستەمكارەكە‌و بانگیان دەكات بۆ باوەڕهێنان لە فەساد‌و ستەمكاری.

3- لە بڕگەی سێیەم دا:- هەرسێ ستەمكارەكە بانگەوازی موسا ڕەت دەكەنەوە‌و بەوە تۆمەتباری دەكەن گوایە سیحربازێكی درۆزنە.

4- لە بڕگەی چوارەم دا: (موسا) ـ سڵاوی خودای لێ بێت ـ هەر بەڵگە‌و نیشانە‌و موعجیزەیەكی پێیە دەیخاتەڕوو بۆ سەلماندنی ڕاستگۆیی‌و پێغەمبەرایەتییەكەی.

5- لە بڕگەی پێنجەم دا: ستەمكارەكان بەو ڕەنگە دژایەتیی بانگەوازەكەی موسا دەكەن كە ستەم لە شوێنكەوتوانی دەكەن وەك ئەوەی كە كوڕەكانیان دەكوژن‌و كچەكانیان دەهێڵنەوە.

6- لە بڕگەی شەشەم دا:- فیرعەونی ستەمكار پیلان لە موسا دەگێڕێت‌و دەیەوێت بیكوژێت‌و داوا لەگەلەكەی دەكات ڕێی ئەوەی پێ بدەن، بۆ ئەم مەرامەش چەند هۆكارێكی جوان كراو‌و پەسند كراویان پیشان دەدات بەمەبەستی پاسا‌و هێنانەوە بۆ خواستەكەی.

7- لە بڕگەی حەوتەم دا:- موسا پەنا بەخودا دەگرێت‌و هانای بۆ دەبات‌و، لە فڕوفێڵی فیرعەون خۆی پێ دەپارێزێت، هەروەها هۆكارە ڕاستەقینەكانی فیرعەون بۆ خەڵكی دەردەخات كە خستوونیە ڕوو بۆ كوشتنی موسا‌و، هۆی تێكچوونی كە سێتیەكەشی ڕوون دەكاتەوە كە چۆن میزاج ونەریتی تێكچووە.

 

بەم بڕگەیەش دیمەنی یەكەم كۆتایی دێت، ئەمەش كۆتایییەكی ئاسایی‌و، كۆتایییەكی هونەریی بەیانكاری كاریگەر‌و، كۆتایییەكی بابەتیانەی ڕەوانبێژانەیە..

موساش (سڵاوی خوای لێ بێت) لەم دیمەنەدا كۆتایی بە ئەركی خۆی دێنێت‌و بە شێوازێكی هونەریی‌و لەڕێی بەڵگە‌و موعجیزەكانیەوە ئەو هۆزە جێ دێڵێت‌و پەنای بە خوداش گرتووە‌و هانای بۆ بردووە‌و پشتیی پێ بەستووە..

ئیدی بەم توێشووە باوەڕداری یە گەورەیەوە بەرەو ڕووی ئەو پیلانەی فیرعەون دەبێتەوە كە لەسەر ژیانی دەیگێڕا‌و، هەروەها پیاوانە‌و بە ئیمان‌و ئارامی‌و جیهادەوە بەرەو ڕووی خودی فیرعەونیش دەبێتەوە.

لە زمانحاڵی ئەم ئایەتانەشدا وادیارە دەیانەوێت جەخت لەسەر ئەو ڕاستییە باوەڕدارانەی بانگەوازكاری لە قەوارەی باوەڕداراندا بكات كاتێك ئایەتەكان دەخوێننەوە، كە با شوێن پێی موسا هەڵبگرن لەو هەڵوێستەدا.

جا بۆیە هیچ كۆتایییەكی هونەریی نابینیت كە لەم كۆتایییە جوانتر بێت، هەروەها كۆتایییەكی باوەڕدارانەی بانگەوازكاری نابینیت كە لەم كۆتایییە چاكتربێت