ماڵپەری قورئانی پیرۆز

بەڕاستی سەیرە‌و داوایەكی سەیر‌و سەمەرەیە كە فیرعەون داوا لە هۆزەكەی دەكات تا ڕێی بدەن (موسا) بكوژێت، مەگەر هەر فیرعەون خۆی نەبوو كە بە هەوا‌و ئارەزووی خۆی حوكمی ئەو خەڵكەی دەكرد‌و هیچ بەرهەڵستكارێكیشی نەبوو، چونكە لە هەموو بیروڕایەكیدا لەگەڵی دابوون، تەنانەت لەوەشدا، كە پڕوپاگەندەی خوایەتی‌و پەروەردگارێتی بۆ خۆی دەكرد..

جا داخۆ مانای ئەمە چی بێت كەوا داوای ڕەزامەندیی ئەوان دەكات بۆ كوشتنی (موسا) هەر چەندە ئەگەر بەبێ پرس‌و مۆڵەتی ئەوانیش بیكوشتایە هەرگیز بەرهەڵستیان نەدەكرد؟!!

وا دیارە ئەو بەم مۆڵەت خواستنە ویستوویەتی خۆی وا پیشان بدات گوایە زۆر سوورە لەسەر هاوكاریی گەلەكەی‌و داوای ڕاوێژ‌و ئاڵ‌و گۆڕی بیروڕایان لێ دەكات, یان وا دیارە ویستوویەتی لەم كارە ترسناكەدا ئەوانیش بەشداركات‌و ئەو هەستەیان بۆ دروست كات گوایە (موسا) دوژمنی ئەوانیشە وەك چۆن دوژمنی خۆیەتی‌و، ئەوانیش وەك خۆی خاوەنی كێشەكەن‌و، بەم ڕەنگەش بەجۆش بن بۆ دژایەتیی (موسا) لەوانەشە ویستبێتی ئاكامی كوشتنەكەی بخاتە ئەستۆیان تاكو بیر لە لێپرسینەوەی (فیرعەون)یان موحاسەبەكردنی نەكەنەوە.

بەڕاستی ستەمكار‌و تاغووتەكان (لە هەر زەمان‌و شوێنێكدا بوو بن) ڕێچكەی فیرعەونیان لە دژایەتی هەق‌و لە كوشتنی پیاوان‌و سەركردەكانی هەقدا وەبەرناوە‌و لە هەمان كاتدا گەلانی ژێر دەستەڵاتیشیان لە هەڵگرتنی باری گوناە‌و خوێنڕشتنی هەقخوازاندا بەشدار كردووە، لەم كارەش دا هەموو بەیاننامە‌و ڕوونكردنەوەیەكی چەواشەكارانەیان ڕێك خستووە‌و، فەتوا‌و پرسیار‌و وەڵامیان ئامادەكردووە‌و، دیدار‌و وت‌ووێژ‌و چاو پێكەوتنیان بۆ سازداوە تاكو لە دەرەنجامی ئەو شێوازەنەدا بە ئارەزووی خۆیان بڕیارەكانی داڕێژنەوە‌و ئەنجام بدەن.