ماڵپەری قورئانی پیرۆز

قورئانى پیرۆز له‌ چوارچێوه‌ى بانگه‌وازى خه‌ڵكیدا بۆ باوه‌ڕهێنان، زۆرێك له‌ بابه‌ته‌ جۆراوجۆره‌كانى هێناوه‌. هه‌ندێجار باسى ئاسمانه‌كانى كردووه‌ و هه‌ندێجارى تر ڕووه‌ك و ئاژه‌ڵه‌كان، ئه‌وه‌ش وه‌ك به‌ڵگه‌ له‌سه‌ر بوونى خواى میهره‌بان.... هه‌روه‌ك زۆر له‌ ئایه‌ته‌كان داوایان له‌ خه‌ڵك كردووه‌ بیر له‌ به‌دیهێنان بكه‌نه‌وه‌، ده‌رباره‌ى به‌دیهێنانى مرۆڤ و ماهیه‌تى جه‌وهه‌رى.

{نَحْنُ خَلَقْنَاكُمْ فَلَوْلَا تُصَدِّقُونَ (57) أَفَرَأَيْتُمْ مَا تُمْنُونَ (58) أَأَنْتُمْ تَخْلُقُونَهُ أَمْ نَحْنُ الْخَالِقُونَ (59)} [الواقعة]، واته‌: ئێمه‌ دروستمان كردوون، بۆچى بڕوا ناكه‌ن؟ جا پێم بڵێن ئه‌و مه‌نیه‌ى له‌جێى خۆیدا دایده‌نێین؟ئایا ئێوه‌ دروستى ده‌كه‌ن یان ئێمه‌ به‌دیهێنه‌رین؟ 

 

ڕووه‌كانى ئیعجاز له‌ به‌دیهێنانى مرۆڤدا، جگه‌ له‌م ئایه‌ته‌ له‌ زۆر ئایه‌تى تریشدا باسكراون. له‌و ئایه‌تانه‌دا زانیارى دوورودرێژى ئه‌وتۆ هه‌یه‌، كه‌ ئه‌سته‌مه‌ مرۆڤێك بیانزانێت له‌ سه‌ده‌ى حه‌وته‌مى زاینیدا ژیابێت، له‌و زانیاریانه‌: 

- مرۆڤ به‌ ته‌واوى له‌ مه‌نى به‌دینه‌هێنراوه‌، به‌ڵكو له‌ به‌شێكى مه‌نى.

- كۆرپه‌له‌ به‌ منداڵدانى دایكه‌وه‌ لكاوه‌ به‌ ته‌واوى وه‌ك زه‌رو (علق) كه‌ به‌ لاشه‌وه‌ ده‌لكێت.

- كۆرپه‌له‌ له‌ ناو سىَ ناوچه‌ى تاریكى منداڵدا دروست ده‌بێت.

ئه‌و خه‌ڵكه‌ى له‌ سه‌رده‌مى دابه‌زینى قورئاندا ژیاون دڵنیابوون له‌وه‌ى مادده‌ى بنه‌ڕه‌تى به‌دیهێنان په‌یوه‌ندى هه‌یه‌ به‌ شله‌ى مه‌نه‌ویه‌وه‌ كه‌ له‌ نێره‌وه‌ له‌ كاتى كردارى زایه‌ندیدا ده‌رده‌چێت، هه‌روه‌ها ئه‌و ڕاستییه‌ى كه‌ منداڵ دواى (9 مانگ) له‌ دایك ده‌بێت ئاشكرایه‌ و پێویست به‌ گه‌ڕان و لێكۆڵینه‌وه‌ ناكات، به‌لاَم ئه‌و زانیارییانه‌ى ئایه‌ته‌كان باسی ده‌كه‌ن زانیارییه‌كن كه‌ زانست تا سه‌ده‌ى بیسته‌م نه‌یدۆزیبوونه‌وه‌.