ماڵپەری قورئانی پیرۆز

پیاوە باوەڕدارەكەی نێو هۆزی فیرعەون (وەك لەدیمەنی دووەمدا بۆمان دەركەوت) توانیی بگاتە نێو دڵی خەڵكی‌و كاریان تێ‌ بكات‌و، بەچەند ئاكارێكی جوان‌و هاندەر دڵیان بكاتەوەو،فیرعەونی ستەمكاریش والێ بكات كە هیچ ئامادەیی یەكی كاریگەری ئەوتۆی نەبێت‌و زمانێكی روون كەرەوەو قایلكاری واشی نەبێت كە لەئاست دەربڕینی ئەودا بێت، چونكە فیرعەون بەچەند سیفەتێكی نالەباری وەك خۆ بەزل دانان‌و لووتبەرزی بەرامبەر یان وەستابوو.

وادیاریشە فیرعەون تێبینی ئەوەی كردووە كە پیاوە باوەڕدارەكە سەركەوتووە لە چوونە نێو جەماوەرو كارتێكردنیانداو، لەوەش ترساوەكە جڵەوی كارەكە لەدەست خۆی دەرچێت‌و خەڵكەكە لێی بتەكنەوەو روو لەو پیاوە باوەڕدارەو بانگەوازەكەی بكەن. هەربۆیەش فیرعەون ناچار بووە كەلە داواكاریییەكەی یەكەمینی (واتە لە مۆڵەت وەرگرتن بۆ كوشتنی (موسا)) پاشگەزبێتەوەو، رەفتارێكی ناهەمواری تەڵەكەبازانە بنوێنێت،‌و لەوڕییەشەوە شانۆ گەرییەكی بێ‌هوودەیی پێشكەش بكات بەمەبەستی خەریك كردنیان بەشتێكی ترەوەو لەبیربردنەوەی راستییەكەیان ئەوەبوو (هامان)ی وەزیری بانگ كردو داوای لێكرد قووللەیەكی بەرزو ساختمانێكی سەركەشی بۆ دروست كات تاكو بگاتە نێو بۆشایی ئاسمان‌و بۆ ئاسمانەكان سەركەوێت‌و بەدوای خوداكەی (موسا)دا بگەڕێت بێگومان نایشی دۆزێتەوە، بەڵام دەیەوێت درۆی موسا بۆ خەڵكی دەرخات‌و ئەو راستییەش پیشانی پیاوە باوەڕدارەكە بدات كەبەرگریی لە موسا دەكرد تا گوایە ئەویش وابزانێت كە خودای موسا لەئارادا نییە.