ماڵپەری قورئانی پیرۆز

هەروەها بەكورتی بانگەوازەكەی بۆ شیكردنەوەو گرنگترینی راستی‌و بنەماكانیی بۆ خستنە روو تاكو بەڵگەی ڕاست‌و ڕەوانی خۆی بخاتە ئەستۆیان‌و، ئەوانیش هیچ پاساوێكیان لە نەزانینی‌و تێنەگەیشتندا نەمێنێت: (ئەی گەلی خۆم پەیڕەویی من بكەن‌و رەفتار بەم قسانەی من بكەن چونكە من رێنموونیتان دەكەم بۆ سەر رێ‌ی چاكەو سەرفرازیی".. بەڵام كەی داوای ئەوەی لێ كردن كە پەیرەویی بكەن؟ بێگومان لەیەكەم دیداری نێوان خۆی‌و گەلەكەیدا داوای ئەم كارەی لێ نەكردن، چونكە گەر ئەم داوایەی لێ بكردنایە ئەوا دەسبەجێ‌ ئەو قسانەیان پێ‌ ناخۆش‌و رەق دەبوو ‌و بانگەوازەكەشیان بەشتێكی كت‌وپڕیی دەبینی‌و، هەر لەو ساتە سەرەتایییانەشدا لێی دەتەكینەوەو پشتیان تێ‌ دەكرد.

ئەم پیاوە باوەڕدارە دوای ئەوەی بەوردی‌و بەشێوەیەكی نەخشەبۆكێشراو زنجیرەیەك دیداریی لەگەڵا دا سازدابوون‌و، دوای ئەوەی چەند هۆكارێكی كاریگەری بۆ كارتێكردنیان بەكار هێنابوو‌و دوای ئەوەش بە ناواخنی عەقڵاو دڵیان گەیشتبوو، ئەوسا داوای لێ كردن كە پەیڕەویی بكەن.

هەروەها لەلایەكی تریشەوە ئەم داواكاریی پەیڕەوكردنە لەخەڵك وەك بەرهەڵستی كردنێكی فیرعەون وایەو، لە بەرامبەر ئەو بانگەشەیەی فیرعەونیشدابوو كاتێك داوای لەخەڵك كردبوو كەوا پەیڕەویی خۆی بكەن، ئەوەبوو پێشتر فیرعەون پێ‌ی گوتبوون:  (من هەر ئەو بیروڕایەی خۆم بەچاك دەزانم‌و هەر منیش رێ‌ی راست‌و چاكتان پیشان دەدەم"، ئێسـتاش پیاوە باوەڕدارەكە پێیــــان دەڵێت: ئەم وتەیەو ئەم بانگەوازو داواكارییەشی بەڵگەیەكە لەسەر جورئەت ‌و ئازایەتی‌و بوێریی، دەنا چۆن وەڵامی فیرعەونی پێ‌ دەدرێتەوەو بانگەشەو داواكارییەكەی ئەویان لەلا رەت دەكاتەوە، یان چۆن لەهەڵبژاردنی رێبازیدا سەرپێچیی لێ دەكات‌و لەهەڵوێستیشیدا بەربەرەكانیی دەكات‌و، لەرێگاشیدا لێی جیا دەبێتەوە؟ خۆ ئەگەر بەراوردی نێوان هەردوو رستەكە بكەین واتە وتەكەی فیرعەون بۆ خەڵكی)و (وتەی پیاوە باوەڕدارەكە بۆ ئەوان) ئەوا جیاوازیی نێوانیان بەدیی دەكەین، جیاوازییەكەش لەنێوان (خۆ بەكەم زانین‌و لەخۆبوردنی پیاوە باوەڕدارەكە)و (خۆ بەزل دانانی فیرعەون)دایە، لەنێوان (بوار رەخساندنی پیاوە باوەڕدارەكە بۆ خەڵكی كە سەربەست‌و سەرپشك بن لە هەڵبژاردنی رێبازدا)و (زەوت كردنی سەربەستی جەماوەر لەلایەن فیرعەونەوە).. هەمدیسان جیاوازیی وتەكانیان لەوەدایە كە پیاوە باوەڕدارەكە لەجەماوەر نزیكەو خۆشیی دەوێن، ئەمەش لەو ئامرازی دواندنەدا كە پییان دەڵێت: (یاقوم..) واتە (ئەی هۆزم خۆم.. ئەی گەلی خۆم.. ئەی كەس‌و خزمانی خۆم..) كەچی فیرعەون خۆی لەئاستیان دا بە گەورەو بەرز دادەنێت‌و سووكایەتییان پێ‌ دەكات‌و بێ‌ ئومێدی دەخاتە بیرو هۆشیانەوە، ئەوەش لەو وتەیەیدا كە پێیان دەڵێت: واتە: (من هیچ رێبازێكی وا نابینم تەنها ئەوە نەبێت كە خۆم بەراستی دەزانم). لێرەدا فیرعەون هەموو بوارێكی بیركردنەوەو لێكدانەوەو رێ‌ی راست گرتنەبەریان لێ زەوت دەكات‌و هەر خۆیشی لەجیاتی ئەوان كاری تێفكرین‌و لێكدانەوەو گەڕان بەدوای ڕێ‌ی راستیاندا بۆ لەئەستۆ دەگرێت، ئەوانیش دەبێت ببن بە چەند تووتییەك‌و قسەكانی بڵێنەوەو بەبیروڕایەوە پابەند بن، بەڵام پیاوە باوەڕدارەكە سەربەستیی گەڕان بەدوای رێبازی راست‌و قەناعەت پێ‌هێنان‌و تێفكرین‌و سەرپشك بوونیان پێ‌ دەدات‌و وایان لێ دەكات كەسێتییەكی خودداربن‌و توانای شوێنكەوتنی رێ‌ی راست‌و بەرچاو رۆشنانەیان هەبێت دوای ئەمەش نەختێك درێژە بەقسە لەگەڵا كردنیان دەدات‌و پوختەیەك دەربارەی ئاینەكەی‌و بانگەوازەكەی باس دەكات تاكو بەڕوونی لێی تێبگەن. لەم ناساندنەشدا تێبینیی ئەوە دەكەین كە یەكەم جار چەقی لەسەر باوەڕو ئیمان داناوە، هەروەها لەسەر مەسەلەی دنیاو رۆژی دوایی‌و، پلەی دنیا بەپێوەری رۆژی دوایی بەشێوەیەك كەدڵیانی بەرۆژی دوایییەوە بەستۆتەوەو رووگەی روانینەكانیشیانی هەر ئاراستەی رۆژی ئاخیرەت كردووە.