ماڵپەری قورئانی پیرۆز

ئەو نەخۆشەی متمانەیەكی تەواوی بە پزیشكەكەی هەیە، ئاكامگەلێك بەدەستدێنێت زۆر باشتر لەو نەخۆشەی متمانەی بە پزیشكەكەی نییە، هەر ئەوەیە قورئانی پیرۆز كردوویەتی لەگەڵ یەك جیاوازی كە پزیشكەكە لە قورئاندا خوای پەروەردگارە!! خوای گەورە توشی ئەم كەموكوڕیە دەروونییەی كردوویت و هەر لەتوانای خۆیشیدایە ئەم زیانەت لێ‌ دووربخاتەوە، بەڵكو لەتوانایدایە بیگۆڕێت بە خێر و چاكەی زۆر، پەروەردگار دەفەرموێت:{وَإِنْ يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ وَإِنْ يُڕدْكَ بِخَيْرٍ فَلَا رَادَّ لِفَضْلِهِ يُصِيبُ بِهِ مَنْ يَشَاءُ مِنْ عِبَادِهِ وَهُوَ الْغَفُورُ الرَّحِيمُ (107)} [يونس]، واتە: (ئەی مرۆڤ) ئەگەر خوا توشی ناخۆشی و زیانێكت بكات، ئەوە هیچ كەس ناتوانێت فریات بكەوێت و لەسەرتی لابەرێت جگە لەو زاتە، یاخود ئەگەر بیەوێت توشی خێر و خۆشیەكت بكات، ئەوە هیچ كەس ناتوانێت بەری فەزڵ و بەخششی خوا بگرێت، هەر كام كە بیەوێت لە بەندەكانی بەهرەوەر دەكات (لە ناز و نیعمەتانی بێشومار) ئەو زاتە هەمیشە لێخۆشبوو و میهرەبانە.

ئەم ئایەتە پیرۆزە لە ناڕەحەتترین بارودۆخەكاندا سەراسیمای لە ژیانمدا دروستدەكرد، هەر كە بە دۆخێكی ناڕەحەتدا تێپەڕدەبووم دەستبەجێ‌ بیری ئەم ئایەتەم دەكەوتەوە، دڵنیابووم ئەم حاڵەتەی گرفتاریم بە فەرمانی پەروەردگارە. خوای گەورە بەتوانایە لە گۆڕینی زیان بۆ خێر و چاكە، هیچ كەس ناتوانێت ڕێگری خێر و چاكەم لێبكات، دڵم ئارام و لەحاڵەتێكی توندی پڕ لە خەمۆكی دەگۆڕام بۆ حاڵەتی ڕۆحیی لێوان لە خۆشی و گەشبینی، بەتایبەت كە دەمزانی بارودۆخی خراپ بە ویستی خوای پەروەردگارە، من پێی ڕازیم چونكە خوام خۆشدەوێت و هەر شتێكیشم خۆش دەوێت كە خوا بۆم بڕیار دەدات.

پرسیارم لێرەدا بۆ تۆ، خوێنەری بەڕێز! ئایا ڕازیی نیت خوای گەورە پزیشكت بێت، كە سەرچاوەی خێر و چاكەیە، هەر ئەو زاتە بەڕێوەبەری ژیانتە؟ ئەگەر لەگەڵ خوا ژیایت ئایا لەو باوەڕەدایت كەسێك هەبێت بتوانێت زیانت پێبگەیەنێت ( لەكاتێكدا كە خوات لەگەڵدایە)؟!