ماڵپەری قورئانی پیرۆز

هەروەها قارون بەم دیاردەی دەوڵەمەندی‌و خۆبادان‌و خۆڕازاندنەوەیەوە ببووە مایەی فیتنەو بەڵا بۆ هەژاران‌و كەم دەستانی (بەنو ئیسرائیل). هۆزی (بەنو ئیسرائیل) لە ڕوانینیاندا بۆ قارون‌و گەنجینەو سامانەكەی بوون بە دووبەشەوە، بەشێكیان باوەڕیان بەخودا هێنابووو چاویان بڕیبووە پاداشت‌و رەزامەندیی خودا لەبەرئەمە بە موڵكی ئەو كابرایە فریویان نەخوارد بووو، ئاواتیان نەدەخواست وەك ئەویان لێ بێت، بەڵكو بەرهەڵستی قارونیان لەسەرخۆ بەگەورە دانان‌و ستەم‌و فەسادەكەی دەكردو، داوایان لێدەكرد ماڵا‌و سامانی لە پێناوی خوادا بەكاربهێنێ‌‌و بۆ سوودو بەرژەوەندیی بەندەكانی خودا تەرخانی بكات.

بەشێكی تریش لەو هۆزە بەموڵك‌و سامانی قارون سەرسام ببوون، چونكە تەرازووی هەق‌و ئەو پێوەرو رێساو بنەمایەشیان لەدەستدابوو، كە قارون‌و موڵك‌و سامانی پێ‌ هەڵسەنگێنن، بۆیەش بەڕای خۆیان ئەو دەوڵەمەندی‌و دەستڕۆیشتوویییەی (قارون)یان بەهۆكارێكی رەزامەندیی خوداو خۆشەویستی خودا بۆ قارون دادەناو ئاواتەخوازبوون، وەك ئەویان لێبێـت، چونكە گوایە بەختێكی گەورەی هەیەو زۆر بەختەوەرە.

((قارون)یش بەبۆنی ماڵا‌و سامان مەست ببوو، ئەمەش لەئاست هەقدا كوێری كردبووو، لەئاست بیستنی ئامۆژگاریی باوەڕداراندا كەڕی كردبوو. كاتێك داواشیان لێكرد، كە لەسەر نیعمەتی ماڵا‌و سامان‌و سوپاسی خودا بكات‌و لەڕێ‌ی سوودو بەرژەوەندیی‌و بواری حەڵاڵادا بیخاتە گەڕو، هەواڵی ئەوەیان پێ‌دابوو، كە ئەوە ماڵا‌و سامانی خودایە، نەك هی خۆی، كەچی بەم وتەیە وەڵامی دانەوە: (من بەزانست‌و شارەزایی‌و توانای خۆم ئەم ماڵا‌و موڵكەم بەدەست هێناوە).

ڕۆژێكیان بە بەرگی ئاڵا‌و واڵاو خۆرازاندنەوەی، بە دیاردەو لووتبەرزی‌و بە خۆنازینەوە، دەچێتە دەرەوەو بەنێو خەڵكیدا دەسووڕێتەوەو دڵی هەژاران دەلەرزێنێت‌و چاوانیان دەفڕێنێت‌و فریودەدات بەلای دنیادا، ئەوەبوو كەدیتیان، گوتیان: (خۆزگە ئێمەش وەك قارون دەوڵەمەندو بەختەوەر بووینایە، چونكە بەراستی خاوەنی بەخت‌و شانسێكی مەزنە)…بەڵام ئەو باوەڕدارانەی كە زانست‌و زانیارییان لەسەر حەقیقەتی دنیاو دواڕۆژ هەبوو، فریودارانیان بەم وتەیە ئامۆژگاری دەكرد:(كوڕە قوڕبەسەرتان وریابن‌و نەخەڵەتێن، هەر پاداشتی خودا باشترە بۆ ئەوكەسەی باوەڕی هێناوەو كردەوەی چاكی كردووە).

سوننەتی خودا لەسەر قارون بەدی هات‌و رق‌و توورەیی خودای بەركەوت، چونكە ئەو ماڵا سامانەی بووە هۆی سزادانی‌و تیاچوونی، ئەوەبوو خودا خۆی‌و ماڵا‌و سامانی‌و گەنجینەكانی‌و خانووەكەشی بەناخی زەویدا بردە خوارەوەو زەویی قڵیشاو قارون‌و سەرجەم موڵك‌و ماڵەكەی لەبەرچاوی بەنوئیسرائیل قووت داو هەموو خەڵكی ئەو هۆزی بەهەردوو بەشەكەوە (واتە بەوانەی ئیمانداربوون‌و بە موڵكی ئەوپیاوە نەخرۆشابوون، بەوانەش كە بەوە سەرسام‌و ئاواتەخوازبوون‌و دەیانەویست وەك ئەویان لێ بێت) هەموویان دیتیان قارون چیی بەسەرهات‌و دیتیشیان كەسێك نەبوو بەهانای بگات‌و بەرگریی لێ بكات، تەنانەت ئەو هەموو ماڵا‌و گەنجینەیەشی سوودێكیان بۆی نەبوو.

وەختێك (بەنوئیسرائیل) دیتیان قارون‌و سامانەكەی چییان بەسەرهات، باوەڕدارە دامەزراوو بەئاواتەكان باوەڕیان زۆرترو زیاتر بوو، ئەو كەسانەش كە تەفرەیان پێ خواردبووو، تادوێنێ‌ هیوای ئەوەیان دەخواست وەك قارون دەوڵەمەندبن، ئەوانیش راستییان بۆ دەركەوت‌و ئەو پەردەیەی سەرچاویای لاچووو سوپاسی خودایان كرد، كە وەك قارون نەبوون، ئەوەبووگوتیان (ئەی هاوار چۆن خودا رزق‌و رۆزیییەكی زۆر بە هەركەسێك دەدا كەخۆی خواستی دانایانەی لێی بێت‌و چۆن رزق‌و رۆزیش لە هەركەسانێكی دی كەم‌و تەنگ دەكاتەوە. ئەمانە بەخواستی خۆیەتی‌و ئەگەر چاكەو منەتی لەسەرمان نەبوایە‌و وەك قارونی لێ بكردینایە ئەوا ئێمەشی بەناخی زەویدا دەبردەخوارەوە، ئەی هاوار كافران شادو سەركەوتوو نابن).