ماڵپەری قورئانی پیرۆز

پێغه‌مبه‌ری خوا (صلي الله عليه وسلم) ئاهه‌نگی رزگاركردنی (خه‌یبه‌ر)ی ده‌گێڕا كاتێك (جه‌عفه‌ری كوڕی ئه‌بوطالب) و ئه‌و موسڵمانانه‌ی كه‌تا ئه‌و ساته‌ له‌گه‌ڵیدا مابوونه‌وه‌ له‌ (حه‌به‌شه‌)، هاتنه‌وه‌..

به‌هاتنه‌وه‌شی دڵی پێغه‌مبه‌ر(صلي الله عليه وسلم) پڕ بوو له‌ خۆشی و، شادی و، مژده‌..

ده‌ستی كرده‌ ملی و فه‌رمووی:

{نازانم به‌كامیان دڵخۆش بم: به‌رزگاركردنی خه‌یبه‌ر.. یان به‌گه‌ڕانه‌وه‌ی جه‌عفه‌ر..}

ئه‌مجا پێغه‌مبه‌ر(صلي الله عليه وسلم) و هاوه‌ڵانی بۆ ئه‌نجامدانی ((عومره‌ی قه‌زا)) به‌ره‌و (مه‌ككه‌) كه‌وتنه‌ ڕێ‌ و، پاش به‌جێهێنانی گه‌ڕانه‌وه‌ بۆ (مه‌دینه‌) و، دڵی (جه‌عفه‌ر) پڕ له‌ شادی بوو به‌بیستنی هه‌واڵی برا بڕواداره‌كانی كه‌ له‌گه‌ڵ پێغه‌مبه‌ردا (صلي الله عليه وسلم) غه‌زای –به‌در و ئوحود… چه‌ندین دیمه‌ن و غه‌زای دیكه‌یان ئه‌نجام داوه‌ و.. چاویشی پڕ له‌ ئه‌شك بوو بۆ ئه‌وانه‌ی كه‌ به‌ پله‌ی شه‌هیدی گه‌یشتن و راستیان كرد له‌گه‌ڵ ئه‌و به‌ڵێنه‌ی دابوویان و..

دڵی ئه‌میش بۆ به‌هه‌شت لێی ده‌دا و په‌رۆشی بوو، له‌بۆسه‌دا بوو بۆ ده‌ستكه‌وتنی ده‌رفه‌تی شه‌هید بوون و، چاوه‌ڕوانی ساته‌ سه‌رفرازه‌كه‌ی ده‌كرد..!!

غه‌زای (موئته‌) هه‌روه‌ك پێشتر باسمان كرد، ئاڵاكانی له‌ ئاسۆدا ده‌شه‌كایه‌وه‌ و به‌ره‌و كۆڕی تێكۆشان ده‌جوڵا..

(جه‌عفه‌ر) هه‌لی ته‌مه‌نی له‌م غه‌زایه‌دا به‌دی كرد، یا ئه‌وه‌تا سه‌ركه‌وتنێكی گه‌وره‌ بۆ ئاینی خودا به‌ده‌ست ده‌هێنێت، یان شه‌هید بوونێكی مه‌زنی له‌ پێناوی خودا بۆ ده‌بێت..

جا له‌ پێغه‌مبه‌ری خوا (صلي الله عليه وسلم) چوویه‌ پێشه‌وه‌ به‌و ئومێده‌ی كه‌ له‌م غه‌زایه‌دا جێگایه‌كی بۆ دیاری بكات..

(جه‌عفه‌ر) به‌چاكی ده‌یزانی كه‌ ئه‌وه‌ گه‌شت و سه‌یران نیه‌ و.. جه‌نگێكی بچوك و ئاساییش نیه‌.. به‌ڵكو جه‌نگێكه‌ كه‌ ئیسلام پێشتر شه‌ڕی وه‌های به‌خۆوه‌ نه‌دیبوو.. جه‌نگ له‌ دژی سوپاكانی ئیمراتۆریه‌تێكی گه‌وره‌ و به‌ربڵاو، كه‌ خاوه‌نی چه‌ك و تفاق و ژماره‌ و ئه‌زموون و ماڵ و سامانێكی وه‌هایه‌ كه‌ عه‌ره‌ب و موسڵمانه‌كان هاوتای نین، له‌گه‌ڵ ئه‌وه‌شدا پڕ به‌دڵ په‌رۆشی بوو، یه‌كێك بوو له‌و سێ‌ كه‌سه‌ی كه‌ پێغه‌مبه‌ر(صلي الله عليه وسلم) بۆ سه‌ركردایه‌تی سوپاكه‌ی دیاری كردوون..

سوپا به‌ڕێ‌ كه‌وت و، (جه‌عفه‌ر)یش له‌گه‌ڵیاندا رۆشت..

له‌رۆژێكی سامناكدا هه‌ردوو سوپا به‌یه‌ك گه‌یشتن....  (كؤتايي بەشي شەشەم)