ماڵپەری قورئانی پیرۆز

بەراستی دیاردەو ڕواڵەتەكانی ژیانی دنیاو، ڕەنگەكانی خۆڕازاندنەوەی نێو دنیا هەمیشەیی‌و نەمرنین، بەڵكو كاتی‌و سنووردارن، سەرەنجامیان نەمان‌و بڕانەوەیە، ئیدی چۆن موڵكدارێتیی ئەو ڕواڵەت‌و رەنگانە پێوەری خۆشبەختی‌و زۆریی بەخت‌و بەشن؟ چۆن شتەكان بە پێوەری كاتی‌و بڕاوە هەڵدەسەنگێنرێن؟! دیارە بەكارهێنان‌و خۆشی چەشتن لەو ڕواڵەت‌و رەنگ‌و ئامرازانە بەنازو نیعمەت‌و دەست بڵاویشەوە، هەمیشەیی‌و بەردەوام‌و هەتا هەتایی نیین، بەڵكو سەرەنجامیان هەر نەمان‌و تیاچوونەو، لەجێگەشیان دا هەژاری‌و بێ‌ بەشی دەچەسپێنن، جا چۆن خاوەنەكەیان خۆشبەخت‌و بەختەوەرە كە ئەمە سەرەنجام‌و ئاكامی بێت؟!

لەڕاستیشدا (قارون) خاوەنی بەختی گەورە (ذو حظ عظیم) نەبووە، ئەگەرچی ڕاستی‌و رادەی خۆڕازاندنەوەكەشی ئاوا بووبێت.. هەر ئەمەش چارەنووسی رابواردن‌و لێ حەوانەوەی بووە.. هەر كەسێكیش لەچۆنیەتی موڵكدارێتی‌و خۆڕازاندنەوەو ژیانی دنیایدا وەك (قارون)بێت، ئەوا ئەویش بەختەوەرو خۆشبەخت نییە سەرەڕای ئەوەی كە هەڵخەڵەتاوانیش واگومان بەرن.. لەراستیدا مرۆڤی بەختەوەرو خاوەنی بەختی مەزن ئەو كەسەیە، كە حەقیقەتی زیندووی مەسەلەكانی دەسگیر بووبێت نەك دیاردە ساختەو لەخشتە بەرەكانی.. مرۆڤی بەختەوەر ئەوەیە لەحەقیقەتی ژیاندا بژی‌و تام‌و شیرینییەكەی چەشتبێت.. مرۆڤی خاوەن بەختی مەزن ئەو كەسەیە، كە باوەڕو قەناعەت‌و دڵنیایی‌و كامەرانیی دیبێتەوە.. مرۆڤی بەختەوەر ئەوەیە، كە بەخۆشییە نەبڕاوەكان‌و بەهەشتی هەمیشەیی‌و پڕ لەنیعمەتی خوداوە سەركەوتوبێت. ئەمەش تەنها بۆ ئیمانداری راستگۆو بەئارام‌و جیهادكارە.. وەك خوداش فەرموویەتی: 

واتە: )ئەی پێغەمبەر.. خەفەت مەخۆ بۆ ئەوانەی بەپەلە بەرەو كفرو بێ‌باوەڕیی دەچن، چونكە ئەوانە ناتوانن هیچ زەرەرێك بەخودا بگەیەنن، خوداش دەیەوێت هیچ بەخت‌و بەشێكیان لەقیامەتدا پێ‌ نەبەخشێت‌و، سزایەكی گەورەشیان بۆ ئامادەكراوە(.

كەواتە بەختی مەزن (الحظ العظیم) ئەو بەختەوەرییەی رۆژی دوایییە نەك هی دنیا.. خۆشی‌و حەوانەوەی نێو نازو نیعمەتی بەهەشتە، جا هەر كەسێك لەو نازو نیعمەتەی بەهەشت بێ‌بەش بێت، ئەوە هیچ بەختێكی نیە. لەڕاستیدا كافرانیش بۆیە هیچ بەختێكیان نییە، چونكە لەو نیعمەتەی بەهەشت بێ‌بەشن، راستیی بەختەوەری‌و بەختی راستەقینەش لەدنیادا ئەوەیە كە لەناخی رەوشتبەرزی‌و خۆڕازاندنەوە بەئەدەب‌و ئاكاری جوان دایەو، لەمامەڵە لەگەڵا كەسانی دی بەگیانی لەخۆبوردوویی‌و سانایی‌و لێبوردن‌و بەزەیی یەوەیەو لەچەشتنی تامی قەناعەت‌و دڵنیایی‌و كامەرانی دایە، خاوەن بەختی مەزن ئەو كەسەیە كە خودا ئەم فەزڵەی پێ‌داوەو ئەو نیعمەتە گەورەیەی پێ‌ بەخشیوە، خودا فەرموویە: 

واتە: (بێگومان چاكەو خراپە وەك یەك نین، جا ئەی باوەڕدار بە جوانترین‌و چاكترین شێوە بەرەنگاری خراپە ببەرەوەو چاكە لەگەڵا خراپەكارەكەدا بكە، ئەوسا دەبینیت ئەو كەسەی، كە دوژمنایەتییەكت لەگەڵیدا هەبووە بووە بەدۆستێكی پارێزەرو گیانی بەگیانی، ئەم سیفەت‌و ڕەفتارە جوانەی لەخۆبوردووییش هیچ كەسێك ناتوانێت بینوێنێت تەنها كەسانی ئارامگر نەبێت، هەروەها هیچ كەسێكیش هەڵوێستی ئاوای بۆ پیشان نادرێت، تەنها كەسێكی بەختەوەرو خاوەن بەختێكی گەورە نەبێت).