ماڵپەری قورئانی پیرۆز

{ئێمە شتێك بەخشیبێتمان وەری ناگرینەوە}..!!

فیترەتی مرۆڤیش رێبازێكی هەیە لێی لا نادات و، پەیڕەوێكی هەیە نایگۆڕێت.. هەر بۆیە كە بەخشندەیی هەبوو ئازایەتیشی لەگەڵدا دەبێت..

بەڵێ‌.. بەخشندەیی راستەقینە و ئازایەتی راست دوانەیەكن، هیچ یەكێكیان لەوی دیكە دواناكەوێت.. خۆ گەر بەخشندەی بەدەر لە ئازایەتی هەبوو، ئەوا بزانە كە ئەوەی بەدی دەكەیت بەخشندەیی نیە.. بەڵكو رووكەشێكی بەتاڵ و درۆزنانەی روكەشەكانی خۆهەڵنان و پڕوپاگەندە كردنە و.. ئەگەر ئازایەتیش هەبوو بەبێ‌ بەخشندەیی، ئەوا بزانە كە ئەوەش ئازایەتی نیە، بەڵكو ویستێكە لە ویستەكانی خۆسەپاندن و ستەمكاری..

كاتێك (قەیس) بەدەستی راستی جڵەوی بەخشندەییەكەی گرتبوو و، بەهەمان دەستی راستیش جڵەوی ئازایەتی و بوێری گرتبوو..

وەك ئەوەی مەبەستی شاعیری ئەم كۆپلەیە ئەو بێت:

اذا ما رایة رفعت لمجد       تلقاها عرابة بالیمین

جا ئەو ئازایەتیەی لە هەموو ئەو غەزایانەدا دەدرەوشایەوە كە لەگەڵ پێغەمبەری خوادا بەشداری كرد كاتێ‌ كە پێغەمبەر (صلی اللە علیه وسلم) زیندوو بوو..

درێژەی بەو درەوشاوەییەدا، لەو جەنگانەشدا كە پاش كۆچكردنی پێغەمبەر(صلی اللە علیه وسلم) بۆ لای پەروەردگاری باڵا، بەشداری تێدا كرد..

ئەو ئازایەتیەش پشت بەراستگۆیی دەبەستێت لە بڕی فێڵ و تەڵەكە و.. بەرەو ڕوونبوونەوە و ڕووبەڕووبوونەوە بچێت، نەك پێچ و پەناو هەڵخەڵەتاندن، خاوەنەكەی گیرۆدەی ناڕەحەتی و سەختی دەكات بەجۆرێ‌ كە ئازاری دەدات و شەكەتی دەكات..

لەو ستاوەش (قەیس) توانای لەرادەبەدەری لەسەر فرت و فێڵ و پێچ و پەنا پشت گوێ‌ خست، ئەو جۆرە ئازایەتیە روون و ئاشكرایەی هەڵگرتبوو، ئەو ناڕەحەتیانەی كە بەهۆیەوە تووشی دەبێت و ئەو نەهامەتیانەی بۆی دێت لەبەر چاوی بوو..

ئازایەتی راست و دروستیش تەنها لە متمانەی خاوەنەكەیەوە سەرچاوە دەگرێت..

ئەو متمانەیەش ئارەزوو یا ویستێك نیە، بەڵكو راستگۆیی لەگەڵ دەروون و، دڵسۆزیی بۆ حەق پێكی دێنێت..

بەم جۆرە كاتێك جیاڕایی كەوتە نێوان ئیمامی عەلی و معاویە، دەبینین لەتەك دەروونی خۆیدا بەتەنها دەمێنێتەوە و، بەدوای راستیدا ویڵە لە رێی بۆ چوونیەوە، هەتا گەر بینی ئیمامی عەلی لەسەر حەقە، ئەوا سەربەرزانە و، ئازا و، چاونەترسانە لەگەڵیدا دەبێت... (كۆتایی بەشی سێ یەم)