ماڵپەری قورئانی پیرۆز

مەلا محمد دەڵێ‌: لە پێشبڕكێكەدا حصری پلەی یەكەم و منیش دووەمم بەدەستهێنا .لەدوای ئەوەوە یەك جار نامەیەكی مامۆستا باستم بۆ هات، كە لەسەرەتای نامەكەیدا نووسیبووی: لە عبدالباسطی كوردییەوە بۆ بەهاری دڵان برام قورئان خوێنی ئێران.

عبدالباسط ئەوەندەی خۆش دەویستم هەر بە (ربیع القلوب) بەهاری دڵان بانگی دەكردم، ئەم نامەیەی كۆمەڵێ‌ وێنەشی تیابوو كە بەیەكەوە گرتبوومان لە پاكستان.

لە كۆڕێكدا لە پاكستان مامۆستا عبدالباسط سورەتی (المۆمنون)ی بەجۆرێك خوێند كە خۆی و هەندێك لە گوێگرەكان دەستمان كرد بە گریان، نزیكەی (٥٠) ڕۆژ بەیەكەوە بووین لە پاكستان.

مامۆستا ڕەبیعی دەڵێت: لەكۆتایی (١٩٦٩)دا لەدوای تەواوكردنی بەرگی پێنجەم لە كتێبی (باقیات صالحات) بەرگی یەكەم و دووەم و سێیەم ئامادەی چاپ بوون، لەبەر گرفتی دارایی توانای چاپكردنی هەر پێنج بەرگەكەمان نەبوو، تەنانەت بۆ چاپكردنی ئەو سێ‌ بەرگەش لە نەبوونی كاغەز لە تەنگانەدا بووم. 

بێتاقەت بووبووم و دەترسام كتێبەكە چاپ نەكرێ‌ و ڕەنجم بەزایە بچێ، بەردەوام دوعام دەكرد (اللهم وفقنی علی إتمام المطالب بشرافە رسول المشارق والمغارب).

خوای گەورەش لە ئاسمانی عەتراویدا بە هەڵهاتنی ڕۆشنایی خۆشەویستەكەی گیانی هیوای لە مندا گەشاندەوە و بە دیداری سەروەرەكەم محمد (صلی الله علیه وسلم) شاد بووم و منی لەترس بێخەم كرد و بە بۆنی كراسەكەی چاوەكانم گەشایەوە و بە دەنگی خۆشی( قُلْ بِفَضْلِ اللَّهِ وَبِرَحْمَتِهِ فَبِذَٰلِكَ فَلْيَفْرَحُوا )یونس: ٥٨، نائومێدی لەلاپەڕەی بیرمدا ڕەواندەوە، لە شەوێكی پیرۆزدا ئەم سەروەرە سەركردەیە هاتە خەوم.

شەوی یەك شەممە (١٧)ی شەوالی (١٤١٠)ی كۆچی، (١٩٩٠)ی زایینی، حەزرەت (صلی الله علیه وسلم) هاتە خەوم لە نزیكی گۆڕستانی میناباد كە گۆڕستانێكی تایبەتە بە ئەهلی سوننە و جەماعەوە لە كرماشان، خەڵكی تەماشایان دەكرد و كاتی نوێژی شێوان بوو، خۆر ون بووبوو، خۆری هیدایەت هەڵهاتوو ئاسمانی جیهانی ڕۆشنكردەوە و نەسیمی ئەو سەروەرە جیهانی خۆش كرد، باڵایەكی نوورانی و جوانی هەبوو دەستی بەرزكردبۆوە و دوعای دوای بانگی دەخوێند (اللهم رب هذه الدعوە التامە...) منیش لەلای چەپی حەزرەتەوە (صلی الله علیه وسلم) كەمێك وەستام ئەم سێ‌ دوعایەم خوێند (خوایە بۆ خاتری ئەم پێغەمبەرە من عەفوو بكەی، خوایە بۆ خاتری ئەم سەروەرە دایك و باوكم عەفوو بكەی)، لە دوعای سێیەمیشدا بە دڵێكی پڕ شەوق و خۆشی و بە چاوی گریانەوە وتم: (خوایە بۆ خاتری ئەم پێغەمبەرە سەركەوتووم بكە)، لەو كاتەدا حەزرەت (صلی الله علیه وسلم) لای كردەوە بەلای مندا و تەواو روخساری دەركەوت. خەندەیەكی كرد و ددانە پیرۆزەكانی دەركەوتن و پووكی موبارەكی پڕبوو لە ئاوی حەیات، فەرمووی: سێ‌ دانەی ماوە!

وتم: قوربان ئاخر هەشت بەرگە، فەرمووی: پێنج بەرگت نووسیوە و سیانی ماوە، لەوكاتەدا سەراپای گیانم وەك مۆم توایەوە، كاتێكی خۆشی بەخش بوو ئەو كاتەی كە هەرگیز لە ژیانما هەستم پێ‌ نەكردووە ،پاشان كەوتە ڕێ‌ و ڕۆیی. 

شایەنی باسە لەساڵی (١٩٩٦)دا لە ڕووداوێكی تەمومژاوییدا تەرمەكەی مامۆستا دۆزرایەوە كە گومان دەبرێ‌ هەروەك زانا سوننیەكانی تری ئێران شەهید كرابێ‌، خوا گیانی پاكی شاد بكا بە بەهەشت.