ماڵپەری قورئانی پیرۆز

خوداش ویستوویەتی بكوژەكەیان بۆ دەرخات، ئەمەش بەهۆی موعجیزەیەكی ماددیی هەستپێكراوەوە، ئەوەبوو سروشی بۆ (موسا) نارد، كە فەرمانیان بەسەربڕینی مانگایەك پێ بكات، هەر مانگایەك بێت، بێ‌ ئەوەی نیشانەكانی دیاری بكات، خۆ ئەگەر هەر مانگایەكیان بگرتایەو سەرببڕیایە ئەوا كارەكەیان بەجێ‌ دەگەینرا، بەڵام بە نەریتی مشت‌ومڕو سستی‌و درێغی كردنی خۆیان ئامادەی راپەڕاندنی ئەو فەرمانە نەبوون. هەربۆیە بەو نەریتی درێژدا دڕی‌و زۆر گوتنەیان لە موسایان پرسی (تەمەنی ئەو مانگایە چەندە)؟ ئەویش گوتی (نە بچووكەو نە بەساڵاچووە بەڵكو تەمەنێكی مام ناوەندیی هەیە).

ئینجا دەربارەی رەنگی مانگا كە پرسییان‌و ئەویش گوتی (زەردێكی تێرەو تەماشاكارانی شەیداو دڵخۆش دەكات. پاشان دەربارەی تواناو كاری مانگاكە پرسییان، ئەویش گوتی (لەلای خاوەنەكەی بەنازو خۆشەویست بووەو هیچ كارێكی پێ نەكردووە، نەلەكێڵانی زەویدا كاردەكات‌و نە لە ئاودێری‌و ئاوڕاكێشان بۆ زەویییە كشتوكاڵییەكانیشدا كاردەكات. لەدواییدا ئەو جۆرە مانگایە سەر دەبڕن هەرچەندە خەریك بووە كە سەریشی نەبڕن. دوای ئەوە موسا سڵاوی خوای لێ بێت- فەرمانی پێ كردوون، كە بە پارچەیەكی مانگا سەربڕراوەكە لەلاشەی پیاوەكوژراوە مردووەكەیان بدەن، ئەوانیش ئەو فەرمانە جێبەجێ‌ دەكەن‌و، یەكسەر خودا كوژراوەكە زیندوو دەكاتەوەو گیانی بەبەردا دێـتەوەو هەواڵی بكوژەكەیان پێ دەگەیەنێت‌و دەڵێت (فڵان كەس منی كوشت). دوای ئەوە دەمرێتەوە، ئەمەش هەمووی لە ناوەندی سەرسوڕمانی خەڵكی –بنو اسرائیل- دا، كە زۆر سەرسام دەبن لەوەی دەیبینن.