ئاماری ماڵپەر
ته‌فسیری ئاسان دابه‌زێنه
خوێندنەوەو تەفسیری قورئانی پیرۆز
- بۆ خویندنه‌وه‌ى قورئان و گوێ گرتن له هه‌ر قورئانخوێنێک کلیک لێره بکه
- بۆ گوێ گرتن له قورئان و خوێنه‌وه‌ى وبینینى ته‌فسیره‌که‌ى پێکه‌وه به‌کوردى و زمانه جیهانیه‌کان کلیک لێره بکه
كۆنترۆڵكردنی هه‌ڵچونه‌كان: به‌شی یه‌كه‌م
ئاماده‌كردنى /سه‌روه‌ر حه‌سه‌ن
مافى له‌چاپدانه‌وه‌ى پارێزراوه بۆ: نوسينگه‌ي ته‌فسير
كىَ له ئێمه ڕۆژێك له ڕۆژان په‌شیمان نه‌بووه‌ته‌وه له وتنى وشه‌یه‌ك یان هه‌ڵسوكه‌وتێكى؟ كىَ له ئێمه ڕۆژێك له ڕۆژان بیرى له كۆنترۆڵكردنى هه‌ڵچوون و هه‌سته‌كانى خۆى نه‌كردووه‌ته‌وه؟ كىَ له ئێمه ئومێده‌وار نییه سۆز و هه‌ڵسوكه‌وته‌كانى به‌رامبه‌ر به‌وانى تر كۆنترۆڵ بكات؟ ئه‌مانه چه‌ند پرسیارێكن حه‌زمكرد ئه‌م توێژینه‌وه‌یه‌یان پىَ ده‌ست پێبكه‌م تاكو له ڕێیانه‌وه بیرۆكه‌یه‌ك بده‌م ده‌رباره‌ى ناوه‌رۆكى ئه‌وه‌ى فێرى ده‌بین، به‌لاَم به‌ر له ده‌ستپێك پێمخۆشه سه‌رنجى خوێنه‌ر ڕابكێشم بۆ خاڵێك كه سه‌رنجى خۆمى ڕاكێشاوه: "ئه‌و كتێبانه‌ى وه‌لاَمى نموونه‌ى ئه‌م پرسیارانه له‌خۆده‌گرن، له‌سه‌ر ئاستى جیهان فرۆشیان زیاترینه!!".
پرۆگرامسازى زمانیانه‌ى ده‌ماریى
به‌وپه‌ڕى ساده‌ییه‌وه ڕه‌نگه زۆر كه‌س ئه‌م زاراوه نوێیه ببیستن "پرۆگرامسازى زمانیانه‌ى ده‌مارى – Neuro linguistic programming"، به‌لاَم به‌شێكى زۆرى خوێنه‌ران نازانن ئه‌م زانسته چییه؟ ئایا ئاماژه‌ى قورئانى له‌باره‌یه‌وه هه‌یه؟
ڕه‌نگه جێى سه‌رسامى خوێنه‌ر بێت! ئه‌م زانسته كه دۆزینه‌وه و دانانى بنه‌ما زانستییه‌كانى پتر له (40 ساڵ)ى به‌سه‌ردا تێپه‌ڕنه‌بووه، وه‌لىَ ته‌واوى بنه‌ماكانى زانسته‌كه له په‌رتوكى خوادا به‌ر له چوارده سه‌ده بوونى هه‌یه! له بابه‌ته‌كانى ئه‌م كتێبه‌دا ئه‌وه‌ى قورئانى پیرۆز هه‌واڵى پێداوین، به‌راوردى ده‌كه‌ین و لێى وردده‌بینه‌وه بۆئه‌وه‌ى بۆمان ده‌ربكه‌وێت قورئانى پیرۆز یه‌كه‌مین كتێبه ده‌رباره‌ى پرۆگرامسازى زمانیانه‌ى ده‌مارى ده‌دوێت نه‌ك زانایانى ئه‌مریكا!
ئه‌م زانسته له حه‌فتاكانى سه‌ده‌ى ڕابردوودا ده‌ستى پێكرد، هۆى دۆزینه‌وه‌ى پێداویستى گه‌شه‌كردنى تێگه‌یشتنه‌كان (مدارك)ى مرۆڤ بوو. خه‌ڵكانێك سه‌ركه‌وتنى گه‌وره له ژیانیاندا ده‌سته‌به‌ر ده‌كه‌ن، هه‌ر ئه‌وه‌یه سه‌رنجى هه‌ندێك له زانایانى ڕاكێشاوه و بڕیارى لێكۆڵینه‌وه‌ى هۆكاره‌كانى ئه‌و سه‌ركه‌وتنه‌یان داوه. پاشان دوو ئاكامى گرنگیان به‌ده‌ستهێنا:
1. هه‌ر مرۆڤێك سه‌ركه‌وتن به‌ده‌ستدێنێت، ڕێگا و شێوازێكى دیاریكراو له به‌ڕێوه‌بردنى كاروبارى ژیانیدا به‌كاردێنێت، ئه‌م ڕێگا و "ستراتیژه"ى كاركردنیه‌تى سه‌ركه‌وتنه‌كانى بۆ به‌ده‌ستهێناوه.
2. هه‌ر مرۆڤێك سه‌ركه‌وتنێك به‌ده‌ستبێنێت، ئه‌وه ماناى وایه ئێمه‌ش ده‌توانین سه‌ركه‌وتنى هاوشێوه به‌ده‌ست بێنین ئه‌گه‌ر هه‌مان ڕێگا و شێوازى ئه‌ومان په‌یڕه‌و كرد. كه‌واته به‌وپه‌ڕى ساده‌ییه‌وه: پرۆگرامسازى زمانیانه‌ى ده‌مارى ئه‌وه‌یه كه چۆن كۆنترۆڵى مێشكت بكه‌یت؟!
ئه‌م به‌رنامه‌ڕێژییه پشت ده‌به‌ستێت به پێدانى كۆمه‌ڵێك هۆكار و هزر و كارامه‌یى به خوێنه‌ر كه به‌هۆیانه‌وه كه‌سه‌كه ده‌كاته مرۆڤێكى سه‌ركه‌وتووى به‌هێز، به‌لاَم ئه‌وه‌ى گره‌نتى سه‌ركه‌وتنت ده‌داتىَ ده‌ستگرتنته به‌سه‌ر خود یان مێشك یاخود كۆنترۆڵى هه‌ڵچوونه‌كان، به ساده‌یى: بریتیه له‌وه‌ى فێر ببیت چۆن ئه‌قڵت به‌كاربێنیت.
زانایان ئاشكرایانكرد هه‌ڵچوونه‌كان و سۆز و هه‌سته‌كان لاى مرۆڤ هه‌ڕه‌مه‌كیانه به‌ڕێوه ناچێت وه‌ك پێشتر وه‌ها گومان ده‌برا، به‌ڵكو به‌رنامه‌یه‌كى ورد هه‌یه ده‌ستى به‌سه‌ردا ده‌گرێت، ئه‌مه‌ش نهێنى پێبه‌خشینى وشه‌ى پرۆگرامسازى "البرمجه"یه به‌م زانسته.
- وشه‌ى پرۆگرامسازى "البرمجه" گوزارشت له‌وه ده‌كات به‌رنامه‌یه‌كى تایبه‌ت هه‌یه بۆ هه‌ڵچوون و سۆزه‌كان كه ده‌كرێت ده‌ستى به‌سه‌ردا بگیرێت به‌ته‌واوى وه‌ك چۆن ده‌ست به‌سه‌ر به‌رنامه‌ى كۆمپیوته‌ردا ده‌گرین!
- وشه‌ى زمانى "لغویه" گوزارشت ده‌كات له به‌كارهێنانى وشه‌كان له په‌یوه‌ندیگرتن له‌گه‌ڵ ئه‌وانى تر و په‌یوه‌ندیگرتن له‌گه‌ڵ خود، واته به‌كارهێنانى زمان له ئاڕاسته‌كردنى هه‌ڵچوونه‌كاندا.
- وشه‌ى ده‌مارى "عێبیه" واته ده‌بێت ئێمه بزانین چۆن كۆئه‌ندامى ده‌مار و ده‌روونمان كارده‌كات، تاكو بتوانین كۆنترۆڵى بكه‌ین و به‌و ئاڕاسته‌یه‌ى خۆمان ده‌مانه‌وێت ئاراِسته‌ى بكه‌ین. به‌ته‌واوى وه‌ك زانیاریت به‌و ئامێرى كۆمپیوته‌ره‌ى له‌سه‌رى كارده‌كه‌یت، چه‌ند زانیاریت به‌و ئامێره‌ى له‌به‌رده‌ستدایه پتر بێت، تواناى زیاترت ده‌بێت بۆ ده‌ستبه‌سه‌رداگرتن و سوودوه‌رگرتن له تایبه‌تمه‌ندییه‌كانى!
ئه‌م پرۆگرامسازیه بایه‌خ به مرۆڤى ته‌ندروست و نه‌خۆشیش ده‌دات، پێویست ناكات تۆ گرفتارى كێشه‌یه‌ك بیت ئه‌وجا بێیت و فێرى ڕێساكانى ببیت، به‌پێچه‌وانه‌وه ده‌بێت سوود له‌م ڕێسایانه وه‌ربگریت و مه‌شق له‌سه‌ر جێبه‌جێكردنیان بكه‌یت له‌كاتێكیشدا كه له حاڵه‌تى ته‌ندروستى باشدایت، ئه‌وه واتلێده‌كات له حاڵه‌ته‌كانى قه‌یران و هه‌ڵوێسته گرانه‌كاندا به‌هێزتر بیت.
هه‌ر یه‌كێك له ئێمه زۆر له تواناگه‌ل و به‌رتوانایى تایبه‌تى هه‌یه، به‌لاَم له‌به‌رئه‌وه‌ى زانیارى ته‌واومان له‌باره‌یانه‌وه نییه به‌كاریان ناهێنین! له‌لایه‌كى تره‌وه ده‌توانیت پتر له نیوه‌ى هه‌ر كێشه‌یه‌ك چاره‌سه‌ر بكه‌یت ته‌نها به‌وه‌ى له قه‌باره‌ى ڕاسته‌قینه‌ى ئه‌و كێشه‌یه حاڵى ببیت!!
پێویسته مێشكت بێنیه پێشچاو به‌وه‌ى كۆمه‌ڵێك ئامێرى ئه‌ندازه‌یى ورده كه به‌پێى به‌رنامه‌یه‌كى دیاریكراو كارده‌كات، تۆیت ئه‌و به‌رنامه‌یه به‌ڕێوه ده‌به‌یت و ئه‌وه‌ش كلیلى سه‌ركه‌وتنه! به‌لاَم ئه‌گه‌ر له‌م ڕاستییه نه‌گه‌یت، ئه‌وده‌مه مێشكت له‌لایه‌ن هاوڕىَ و خێزان و كۆمه‌ڵگا و كاریگه‌رییه‌كانى ده‌وروبه‌ره‌وه به‌ڕێوه ده‌برێت، دواجار ده‌بیته مرۆڤێكى هه‌ڵچوو و كه‌متوانا له ده‌ستگرتن به‌سه‌ر خود یان هه‌سته‌كانتدا.
زنجيره‌ى قورئان و زانست (4)
قورئان و گه‌ردوونناسى له نوسينگه‌ي ته‌فسير