ماڵپەری قورئانی پیرۆز

{هاوڕێیەتی زوبەیری كوڕی عەوامم كرد لە هەندێك گەشتیدا و جەستەیم بەدی كرد، بینیم هەلاهەلا بوو بە شمشێر و، سەر سنگیشی بەهۆی شوێنی لێدانی شمشێر و رمەوە وەك بێژنگی لێهاتبوو.

پێم وت: سوێند بەخوا ئەوەی بە جەستەی تۆوە بینیم هەرگیز بەهی كەسی دیكەوە نەمبینیوە..

پێی وتم: سوێند بەخوا هەموو برینەكانم لەگەڵ پێغەمبەری خوادا (صلی الله علیه وسلم) بووەو لەپێناوی خوادا بریندار بووم}..

لە جەنگی ئوحودیشدا پاش ئەوەی سوپای قوڕەیش پشتیان هەڵكرد و بەرەو مەككە گەڕانەوە، پێغەمبەر(صلی الله علیه وسلم) ئەو و ئەبوبەكری دانا بۆ چاودێریكردنی لەشكری قوڕەیش و شوێنكەوتنیان هەتا بۆیان دەردەكەوێت كە موسڵمانان هێزیان ماوەو بیر لە هاتنەوە بۆمەدینە و درێژەدان بە شەڕ نەكەنەوە.

ئەمجا ئەبوبەكر و زوبەیر سەركردایەتی حەفتا موسڵمانیان كرد و، لەگەڵ ئەوەی كە ئەوان كەوتبوونە شوێن سوپایەكی سەركەوتوو، بەڵام ئەو لێزانیەتییە جەنگیەی كە ئەبوبەكر و زوبەیر بەكاریان هێنا وای لە قوڕەیشیەكان كرد وا گومان بەرن بە هەڵەداچوون لە مەزەندەكردنی زەرەرو زیانی موسڵمانەكاندا و، وایان لێكردن كە ئەو دەستە بەهێزە كە ئەبوبەكر و زوبەیر بەهێزیەكەیان خستە روو، بەرەتای سوپای پێغەمبەرە (صلی الله علیه وسلم) وا دیارە دەیەوێت شاڵاوی بەدواداكەوتنیان  بەشێوەیەكی ترسناك دەست پێ‌بكات، هەر بۆیە قوڕەیش كەوتنە خۆیان و، بە پەلە رووەو مەككە كەوتنە رێ‌..!!

لە رۆژی (یەرموك)یشدا زوبەیر بە تەنها بۆ خۆی سوپایەك بوو.. كاتێك بینی زۆربەی ئەو موسڵمانانەی كە ئەم سەركردایەتی دەكردن لە بەردەم لێشاوی كێوی رۆمەكاندا خەریكە شكست دێنن، بەدەنگی بەرز وتی: (الله اكبر) و.. بە تەنها ئەو كێوە سەختەی بڕی و، بە شمشێرەكەی لێی دەدان و.. دواتر بە نێوەندی ئەو ریزە پڕ مەترسیدارانەدا گەڕایەوەو، شمشێرەكەیشی بێ‌ سڵاكردنەوە بەدەستی راستی گرتبوو..!

زوبەیر گەلێك تامەزرۆی شەهیدی بو و، زۆر ئارەزوومەندی مردن بوو لەپێناوی خوادا..

لەو بارەیەوە دەیوت:

{تەڵحەی كوڕی عبیدالله ناوی پێغەمبەرانی لە كوڕەكانی دەنا و، دەیزانی كە لەپاش موحەممەد (صلی الله علیه وسلم) پێغەمبەری دیكە نیە..

منیش ناوی شەهیدانم لە كوڕەكانم دەنا بەو ئومێدەی كە شەهید ببن}..!

بەم جۆرە كوڕەكەی ناونا (عبدالله ی كوڕی زوبەیر) بەناوی هاوەڵی شەهید (عبدالله ی كوڕی جەحش)، كوڕێكی دیكەشی ناونابوو (مونزیر) بەناوی هاوەڵی شەهید (مونزیری كوڕی عەمر)ەوە. یەكێكیدیكەشیانی ناونابوو (عوروە) بەناوی هاوەڵی شەهید (عوروەی كوڕی عەمر)ەوە.. كوڕێكی تریشیانی ناوی (حەمزە) بوو، بەناوی شەهیدی پایەبەرز (حەمزەی كوڕی عبدالمطلب)ەوە.. یەكێكیشی ناونابوو (جەعفەر) بە ناوی شەهیدی مەزن (جەعفەری كوڕی ابوطالب)ەوە.. ناوی یەكێكی دیكەشیانی نابوو (موصعەب) بەناوی هاوەڵی شەهید (موصعەبی كوڕی عومەیر)ەوە.. ناوی یەكێكی دیكەشیانی نابوو (خالد) بەناوی هاوەڵی شەهید (خالیدی كوڕی سەعید)ەوە..

بەم جۆرە ناوی شەهیدانی هەڵدەبژارد بۆ ناونانی كوڕەكانی، بەو ئومێدەی كە ئەو رۆژە ئاكامیان دێت شەهید ببن..!!