ماڵپەری قورئانی پیرۆز

كه‌ژاوه‌كه‌ گه‌یشته‌ ماڵه‌كانی (به‌نی سالمی كوڕی عه‌وف)، جا هاتنه‌ رێگای وشتره‌كه‌ و وتیان: ((ئه‌ی  پێغه‌مبه‌ری خوا (صلى الله عليه وسلم)، لای ئێمه‌ لابده‌، ژماره‌مان زۆره‌ و، خاوه‌نی توانا و شت و مه‌كین)).

پێغه‌مبه‌ریش (صلى الله عليه وسلم) له‌ كاتێكدا كه‌ ئه‌وان ده‌ستیان گرتووه‌ به‌ ره‌شۆی وشتره‌كه‌یه‌وه‌ پێیان ده‌ڵێت:

{رێگای بۆ چۆڵ بكه‌ن، چونكه‌ فه‌رمان پێكراوه‌}.

ئه‌مجا كه‌ژاوه‌كه‌ ده‌گاته‌ گه‌ڕه‌كی (به‌نی به‌یاضه)، دواتر لای (به‌نی سه‌عد) و، گه‌ڕه‌كی (به‌نی حارثی كوڕی خه‌زره‌ج)، دواتر گه‌ڕه‌كی (به‌نی عه‌دی كوڕی نه‌جار) و.. هه‌موو یه‌كێك له‌و هۆزانه‌ش ده‌هاتنه‌ سه‌ر رێی وشتره‌كه‌ی و، تكایان لێده‌كرد كه‌ به‌ دابه‌زینی له‌لایان به‌خته‌وه‌ریان بكات، پێغه‌مبه‌ریش (صلى الله عليه وسلم) خه‌نده‌ی سوپاسگوزاری له‌سه‌ر لێوانی بوو، وه‌ڵامی ده‌دانه‌وه‌:

{رێگای بۆ چۆڵ بكه‌ن، چونكه‌ فه‌رمان پێكراوه‌}.

پێغه‌مبه‌ر (صلى الله عليه وسلم) دیاریكردنی جێگای دابه‌زینی واز لێ‌هێنابوو بۆ قه‌ده‌ر، چونكه‌ ئه‌و دابه‌زینه‌ی مه‌ترسی و پله‌ و پایه‌ی خۆی ده‌بێت و.. له‌سه‌ر  خاكه‌كه‌ی مزگه‌وت  بونیات ده‌نرێت كه‌ لێوه‌ی په‌یام و روناكی خودا بۆ تێكڕای دونیا پرشنگ ده‌دات و.. له‌ په‌نایشه‌وه‌ ژوور یان چه‌ند ژورێك له‌ قوڕ و خشت دروست ده‌كرێت.. كه‌ له‌ شت و مه‌كی دونیا ته‌نها بڕی پێویستی تێدایه‌، یان هێنده‌ی زۆر پێویستی!! تێیدا مامۆستا و پێغه‌مبه‌رێك نیشته‌جێ‌ ده‌بێت كه‌ بۆ ئه‌وه‌ هاتۆته‌ ژیان تا گیانی داڕوخاوی ببوژێنێته‌وه‌و هه‌موو رێز و سڵاوێكی ببه‌خشێته‌ ئه‌و كه‌سانه‌ی كه‌ وتیان: (په‌روه‌ردگارمان خودایه‌ و پاشان له‌سه‌ری جێگیربوون).. به‌ ئه‌وانه‌ی كه‌ باوه‌ڕیان هێنا و ئیمانه‌كه‌یان به‌سته‌م دانه‌پۆشی.. به‌ ئه‌وانه‌ش له‌ ئاینداریاندا دڵسۆز بوون بۆ خودا، به‌ ئه‌وانه‌ی له‌ سه‌ر زه‌ویدا چاكساز بوون و خراپه‌خواز نه‌بوون.