ماڵپەری قورئانی پیرۆز

(سید قطب) گوتوویەتی: (كۆمەڵی سێیەم- یان ئۆممەتی سێیەم – دەقی قورئانی لێ بێدەنگە لەوانەیە ئەمە بۆ بەكەم گرتن‌و بێ بایەخ دانانیان بێت – ئەگەرچی بەر سزاكەش نەكەوتبن- چونكە ئەوان بەشێوەیەكی لەبارو پێویست بەرهەڵستیی تاوانكارانیان نەكرد، بەڵكو شێوازێكی نالەبارو ناهەمواریان گرتەبەر، بۆیەش شایستەی پشتگوێ‌ خستنی قورئان بوون، سەرەڕای ئەوەی ئەگەر شایستەی سزاكەش نەبووبن).

لە بێ‌دەنگیی قورئانیش لەئاست بێدەنگبواندا، كە ڕۆڵا‌و بایەخی بەكەم گرتوون، ئەو ڕاستییە وەردەگرین، كە بێگومان ئەوكەسەی لەئاست هەقدا بێ‌دەنگەو، لەكاتی نكووڵی‌و بەرهەڵستییەكدا لێی دادەنیشێت‌و، لە بواری ئامۆژگاری‌و بەیادهێنانەوەدا ترسنۆكەو، لە ڕووبەڕووبوونەوەش دەترسێت، بەڕاستی شایانی بەسووك سەیركردن‌و پشتگوێ‌ خستن‌و لەبیركردنە. جا ئەگەر كەسێك شایستەی یادكردن‌و وەسف‌و ستایشكردن بێت‌و ناوو یادی لەمێژوودا بە نەمریی بـمێنێتەوەو لە تۆماری بوون‌و یادەوەریی زیندووەكاندا بـمێنێت‌و یادی بكرێتەوە، ئەو كەسە بێگومان هەر پیاوێكی ئازاو بوێرو چاونەترسە، قوڕئانیش ڕێنمایی ئەو جۆرە كەسانە دەكات، كە ئەگەر دەیانەوێت بناسرێن‌و یادبكرێنەوەو هەمیشە بەچاكی ناویان لەسەر زاری خەڵكی بێت، با ئەو ڕێگەیە بگرنەبەر، كە دەیانگەیەنێتە ئەو سیفەتانە، ئەویش ڕێگەی بانگەوازو ئامۆژگاریكردنی خەڵكی نەفام‌و بەیادهێنانەوەی سەرپێچیكارانە، ڕێگەی بانگەوازو ئامۆژگاریكردنی خەڵكی نەفام‌و بەیادهێنانەوەی سەرپێچیكارانە، ڕێگەی كۆشش لەگەڵا خۆكردن‌و جیهادیشە، هەمیشە لەنێو خەڵكێكی زۆردا كەسێكی وایان تیابووە، كە لە پەراوێزی ژیان دابووەو دوورە پەرێزبووەو نەناسراوو پشت گوێ‌ خراوولەبیركراو بووەو هیچ كەسێك ناوی نەبیستووەو، هەر لەسەر ئەو حاڵەتی نەناسراوێتی‌و پشتگوێ‌ خراوی‌و لەبیركراوییە دەمرێت‌و كەس هەست بە مردنیشی ناكات، ئەم جۆرەكەسە خەڵكی لەدنیاداو لەكاتی ژیانیدا لەبیریان چۆتەوە پێش ئەوەی ماوەیەك دوای مردنی لەبیریان بچێـتەوە.

بێگومان مێژوو یادو ناوی ئەو جۆرە كەسە، لە بیركراوو نادیارانەی فەرامۆش كردووە، چونكە مێژوو یادی كەسانی بێسەنگ‌و بێ‌كار ناكات.

 دیارە هەر لە كۆمەڵادا پیاوانی گەورە دەژین‌و دەمرن‌و، پڕ بەگوێ‌ی خەڵكیش هەواڵیان دەبیسرێت‌و هەردەم لەبەرچاویانن‌و وجودو ژیانیان بۆ پڕ دەكەنەوەو لەنێوانیاندا دەژین، دوای مردنیشیان لە هزرو هۆش‌و دڵا‌و مێژووی كۆمەڵادا دەمێنن، ئەوانیش پیاوانی ئیماندارو خۆڕاگرو موجاهیدن كە مێژوو ناویانی بە نەمریی هێشتۆتەوە، دیارە مێژووش تەنها كارگوزارو هەوڵدەران دەناسێتەوە، تەنها جیهادكارانیش یاد دەكاتەوە، ئا ئەمەیە ڕێگەی ناوبانگ‌و نەمریی، دەی لەكوێن ڕێبوارانی ڕێگەكە؟