ماڵپەری قورئانی پیرۆز

ده‌ڵێم: كاتێك گوێبیستی ئه‌و ناوه‌ ده‌بیت به‌و جۆره‌، یان كاتێك كه‌ زۆر پێی ده‌گه‌یت و، له‌ زۆر جێگای په‌ڕاوی فه‌رمووده‌ و، ژیاننامه‌ و، فیقه و، ئایندا به‌شێوه‌یه‌كی گشتی به‌دی ده‌كه‌یت، بزانه‌ كه‌ به‌ هاوه‌ڵێك ده‌گه‌یت كه‌ له‌ زۆربه‌ی هاوه‌ڵان زیاتر سه‌رقاڵی هاوه‌ڵێتی و گوێگرتن بوو.

چونكه‌ گه‌نجینه‌ی فه‌رمووده‌ شیریه‌كان و ئه‌و رێنوێنیه‌ داناییانه‌ی كه‌ له‌ پێغه‌مبه‌ره‌وه‌ (صلى الله عليه وسلم) له‌به‌ری كرد، نمونه‌ی زۆر كه‌مه‌..

ئه‌و، به‌هۆی ئه‌و به‌هره‌و ، ئه‌و گه‌نجینه‌یه‌ی كه‌ هه‌یبوو، له‌ زۆربه‌ی هاوه‌ڵان به‌تواناتر بوو له‌ گێڕانه‌وه‌ی ئه‌و رۆژانه‌ی كه‌ پێغه‌مبه‌ر (صلى الله عليه وسلم) و هاوه‌ڵانی (رضى الله عنهم) تێیدا ژیان و پێی گه‌یاندن-گه‌ر ئیمانت پته‌و و ده‌روونت به‌په‌رۆش بێت- به‌و ئاسۆیانه‌ی كه‌ چاكه‌كانی (موحه‌ممه‌د) (صلى الله عليه وسلم) و هاوه‌ڵانی به‌خۆی دی، كه‌ مانای خوێن به‌ژیان ده‌به‌خشێ‌ و، تێگه‌یشتن و پێگه‌یشتنی به‌ره‌و لای رێنوێنی ده‌كرد.

خۆ گه‌ر ئه‌م دێڕانه‌ په‌رۆشی ئه‌وه‌یان كردویت كه‌ ئاشنای ئه‌بوهوره‌یره‌ ببیت و گوێبیستی سه‌ربورده‌ و به‌سه‌رهاتی ببیت، ئه‌وا فه‌رموو ئه‌وه‌ تۆ و ئه‌وه‌ی كه‌ ده‌ته‌وێت..

ئه‌و یه‌كێكه‌ له‌وانه‌ی كه‌ شۆڕشی ئیسلام هه‌موو ئه‌و گۆڕانكاریه‌ مه‌زنانه‌ی هێنایه‌ ئارا تێیدا ره‌نگی دابوویه‌وه‌.

له‌ كرێگرته‌ییه‌وه‌ بۆ سه‌رگه‌وره‌.

له‌ ونبوویه‌كی نێو جه‌نجاڵی، بۆ ناودار و پێشه‌وا..!!

له‌ كه‌سێكی كڕنۆش به‌ری به‌رده‌م به‌ردێكی داتاشراو، بۆ بڕوادارێك به‌خودای تاك و ته‌نهای خاوه‌ن ده‌سته‌ڵات..

ئه‌وه‌تا خۆیشی ده‌دوێت و ده‌ڵێت:

{به‌هه‌تیوی گه‌وره‌ بووم و، به‌ نه‌داری كۆچم كرد و.. كرێ‌گرته‌ی (بوسره‌ی كچی غه‌زوان) بووم به‌ نانه‌سكێ‌..!!

له‌كاتی دابه‌زینیاندا خزمه‌تم ده‌كردن و، له‌كاتی سواربوونی وڵاخه‌كانیان بۆم ده‌گرتن..

ئێستاش ئه‌وه‌تام خودا ژنی پێ‌ به‌خشیوم و، سوپاسی خوا ده‌كه‌م كه‌ ئایینی كردۆته‌ پاڵپشت و، ئه‌بوهوره‌یره‌شی كردۆته‌ پێشه‌وا}..!