ماڵپەری قورئانی پیرۆز

بۆنموونە خۆر پلەی گەرمی چەقەكەی (15ملیۆن پلەی سەدی)یە. زانایان پێیان وایە خۆرەكەی خۆمان بڕێكی زۆر هایدرۆجینی هەیە. هەروەها خۆر لە هەر چركەیەكدا (616ملیۆن تۆن) هایدرۆجین دەكات بە (612ملیۆن تۆن) هیلیۆم، بەمەش (4ملیۆن تۆن) كەمدەكات كە دەبێتە وزە بەشێوەی گەرمی و ڕووناكی و تیشكەكانی تر. 

بەم شێوەیە بڕی (53.222.400.000.000 تۆن) هایدرۆجین سوتەمەنی ڕۆژێكی خۆرە، هەروەها لە هەر مەترێكی چوارگۆشەی خۆردا نزیكەی (64ملیۆن وات) وزە دەنێرێتە دەرەوە. كەواتە خۆر بەردەوام لە كەمبووندایە و ڕۆژێك دێت دەكوژێتەوە و دەبێتە تەنێكی ئاسمانی وەك كونی ڕەش یان نیوترۆنە ئەستێرە، یان گرگنی سپی. 

ئەستێرە بە قۆناغەكانی ژیانی خۆیدا تێپەڕدەبێت، لە سەرەتای دروستبوونیەوە لە تەمگەلەوە، پاشان لەوپەڕی گەنجیدا كە كارلێكەكانی بەردەوامە و بڕێكی زۆر هایدروجینی هەیە و لە كۆتاییشدا پاش نەمانی هایدرۆجینەكەی و گۆڕانی بۆ تەنێكی ئاسمانی تر كە سیفەتی ئەستێرەی تێدا نییە. ئەستێرەكان لەم قۆناغەدا دەگۆڕێن بۆ زەبەلاحی سوور یان نیوترۆنە ئەستێرە یان گرگنی سپی یاخود كونی ڕەش... خوای گەورە دەفەرموێت:{إِذَا الشَّمْسُ كُوِّرَتْ (1) وَإِذَا النُّجُومُ انْكَدَرَتْ (2)} [التكوير] دیارە كوژانەوەی خۆر واتای نەمانی كارلێكی ناوكە یەكبوونەكانیەتی كە ئەوكاتە هیچ ڕووناكییەك نادات، هەروەها پەروەردگار دەفەرموێت:{وَالنَّجْمِ إِذَا هَوَى (1)} [النجم] واتە: سوێند بە ئەستێرە كاتێك دەمرێت.