ماڵپەری قورئانی پیرۆز

1- لە ئایەتەكەدا بە دەستەواژەی كرداری سیحربازی لە (سولەیمان) دوور خستۆتەوە، بە مانای (سولەیمان سیحرباز نەبوو‌و مامەڵە‌و هەڵس وكەوتیشی بە سیحر نەكردوە)، جا كەوابوو كاتێك ئایەتەكە (سیحر)ی لە كەسێتی (سولەیمان) دوورخستۆتەوە، ئەوا كفر‌و بێ‌باوەڕیشی لێ‌ دوور خستۆتەوە  ئەمەش دەلالەت لە هاوجووتی‌و پێكەوە لكاویی نێوان سیحر‌و كفر دەكات، كە پەیوەندییەكی بەهێزیان لەنێواندا هەیە.

2- سەلماندنی كفر‌و بێ‌باوەڕیی شەیتانەكان لەو حاڵەتەدا، كە خەڵكی فێری سیحربازیی دەكەن، كافر بوونی شەیتانەكانیشی بەم ڕستەیە سەلماندووە. بێگومان شەیتانەكان خۆیان كافر ببوون، چونكە خەڵكییان فێری سیحربازیی كردبوو، بە مانای لەكاتێكدا كافر بوون، كە سەرقاڵی كاری سیحر‌و جادووگەریی بوون‌و كردەوەیان پێ‌كرد‌و كەسانی تریشیان پێ‌فێر كرد. پێگەی ڕستەی ((یُعَلِّمُونَ النَّاسَ السِّحْرَ))ەش لە جێگەی (نصب علی الحال) دایە، چونكە رستەیەكی (حالی)یە، واتە تایبەتە بە حاڵا‌و بار‌ودۆخی ئەو كەسانەی، كە لە حاڵەتی (دەرس دادانی خەڵكیدا بە سیحر‌و جادوو) كافر بوون.

3- وریاكردنەوەكەی (هارووت‌و مارووت) بۆ خەڵكی كە سەرقاڵی سیحر‌و كارپێ‌كردنی نەبن، بەم شێوە دەربڕینە هاتووە: دیارە، كە هەڵبژاردنی وشەكانیش لە قورئاندا مەبەستدارە‌و سروش‌و ئاماژەی وشە هەڵبژێردراوەكانیش ئەو مەبەستانە دەگەیەنن.. ئەو دوو فریشتەیە گوتوویانە بێگومان ئێمە هۆی تاقیكردنەوە‌و هەڵسەنگاندنتانین، جا تۆش كار بە سیحر مەكە‌و بێ‌باوەڕ مەبە.. ئەوان پێ‌یان نەگوتوون (سیحر مەكە)، بەڵكو پێیان گوتوون ((بێ‌باوەڕ مەبن))، ئەمەش بۆ پێكەوەلكاندن‌و پێك گەیاندنی نێوانی سیحر‌و كفرە.

بێگومان ئەم دەستەواژە هەڵبژێرراوانەی نێو ئایەتەكانیش، لە بەڵگە هەرە جوان‌و نایابە دەستنیشانكراوەكانی قورئانی پیرۆزن، چونكە لێرەدا قورئان، كە ویستویەتی (سیحر) لە ئاكاری (سولەیمان) دوورخاتەوە، ئەوا (كفر‌و بێ‌باوەڕی) لـێ‌ لاداوە‌و لێی دوورخستۆتەوە.

جا لەكاتێكدا هەردوو فریشتەكەش كاری سیحربازییان لە خەڵكی قەدەغە كردووە، ئەوا لە سەرەتادا ئاكاری كفر‌و بێ‌باوەڕێیتیان لـێ‌ قەدەغەكردوون.

4- پێغەمبەر صلى الله علیە وسلم سیحربازیی بە كفر‌و بێ‌باوەڕیی داناوە‌و، هەركەسێكیش بڕوا بە كاهین‌و سیحرباز‌و جادووگەر بكات بە كافری داناوە.

لەمبارەیەوە (ابن حجر) لە (فتح الباری)دا گوتوویەتی: "دەربارەی سەرزەنشتكردنی كاهین‌و جادووگەران، خاوەنانی كتێبەكانی (سوننەت) فەرموودەیەكی لای (ابوهریرە)یان هێناوەتەوە كە زانای فەرموودەناس (الحاكم)یش بە (صحیح)ی داناوە‌و، پێغەمبەر صلى الله علیە وسلم  لە فەرموودەكەدا، كە (ابوهریرە) بە (مرفوع) هێناویەتی، فەرموویەتی: ((من أتی كاهناً أو عرّافاً فَصَدَّقَهُ بِما ێقُولُ، فقد كفر بما أنزل علی محمد))، واتە: هەركەسێك بچێتە لای كەسانێك كە خۆیان بە چاكەرەوە‌و گەردوونناس‌و زانای هەمو دەردێك دەزانن (واتە كە جادووگەر چەواشەكارن)‌و هەركەسێك بۆ لای ئەم جۆرە كەڵەكبازانە بچێت ئەوا بێگومان باوەڕی بەو پەیامەی خوا نی یە كە بۆ (محمد)ی پێغەمبەری خۆی صلى الله علیە وسلم ناردۆتە خوارەوە.

هەر لەمبارەیەوە بەڵگەی ڕاست‌و هاوشێوەی لە (جابر)‌و (عمران كوڕی حصین) كە (البزار) بە دوو سەنەدی چاكەوە هێناونی، گێڕاونەتەوە، (ابو یعلی)یش لە فەرموودەیەكی لای (ابن مسعود)ەوە بە سەنەدێكی چاك هێناوێتی‌و بەڵام بە ڕاشكاوی دانی بە پلەی (مرفوع)ێتی دانەناوە، چونكە فەرموودەی لەم جۆرە‌و پلە‌و ئاستی گێڕانەوەكانیشی تەنها بە بیروڕا نادركێنرێت( )."