ماڵپەری قورئانی پیرۆز

زانینی سیحر‌و ناسینی ئەفسانەكاریش بە گوناهێك دانانرێت، وەك چۆن گوناهێك لە زانینی گرتنەوەی (مەی)‌و داتاشینی پەیكەر‌و دروستكردنی ئامێری مۆسیقا‌و كەرەسەی یاریدا نیە، بەڵكو گوناه لە جێبەجێ‌كردنی عەمەلیانەی ئەو زانستەدا هەیە كە تێیدا زیان بە كەسانێك دەگەیەنرێت كە نابێت زیانیان لەسەری پێ‌ بگات.

كەوابوو هیچ گوناهێك لەو زانستی ئەفسانەیەدا نیە، كە خوا بۆ هەردوو فریشتەكەی ناردووە‌و لەوەشدا گوناه نیە، كە هەردوو فریشتەكە خەڵكیان فێری سیحربازیی كردوە، چونكە فێركردنی هەركەسێكیان، كە فێریان كردبێت بە فەرمانی خوا بووە‌و دوای ئەوەش بووە، كە كەسە فێركراوەكەیان ئاگادار كردوە لەوەی ئەمە تاقی كردنەوەیە بۆت، پاشان وریایان كردۆتەوە لەوەی نابێت كاری سیحربازی بكات‌و، نابێت بە كردەوە ئەنجامی بدات، ئەگینا بێ‌باوەڕ دەرچێت. بەڵكو گوناهەكە لەسەر ئەو كەسەیە، كە كاتێك سیحر لەو دوو فریشتەیەوە فێر دەبێت‌و كاری پێ‌دەكات، چونكە كاتێك خواش باسی فێربوونی كردوە، لە هەمان كاتدا ڕێ‌ی لە كارپێكردنیشی گرتووە، جا كە خوا خۆی ڕێگەی فێربوونی ئەو كارەی بە ئادەمیزاد داوە، شەرمەزارییەكی بۆ هیچ كەسێك تێدا نیە، كە فێری بووبێت، وەك چۆن ئەو دوو فریشتەیەش لە فێربوون‌و زانینی سیحرەكەدا شەرمەزار نەبوون، چونكە زانینی ئەو كارەیان بەپێ‌ی ئەو زانیاریانە بوو، كە خوا بۆی ناردبوونە خوارەوە( )".

خەڵكیش ئەگەر سەرپێچییان لە ئامۆژگارییەكانی ئەو دوو فریشتەیە كردبێت‌و، ئەو كاری سیحربازییەی، كە ڕێ‌ی لـێ‌گرتبوون ئەنجامیان دابێت‌و لە جیاكردنەوە‌و پەرتەوازەیی نێوان ژن‌و مێرددا بەكاریان هێنابێت، ئەوا لە ڕاستیدا هیچ زیانێكی بەو دوو فریشتەیە نەگەیاندووە، بەڵكو زیانی بۆ سەر خەڵكەكە خۆیان هەبووە.. وەك ئیمامی (گبری)یش گوتویەتی: "كۆمەڵە كەسێك لە پیاوچاكان‌و شوێنكەوتوانی ڕێبازی خوا لە جیاتی خوا پەرستراون، ئەمەش زیانی بە خودی ئەو پیاوچاك‌و ئەولیایانە نەگەیاندووە، چونكە ئەوە بە فەرمان‌و ڕاسپاردەی خۆیان نەبووە، بەڵكو هەندێك كەس هەر لەخۆیانەوە ئەو پیاوچاكانەیان پەرستووە‌و، پەرستراوەكانی نكووڵییان لەو كارە ناشەرعییە كردوە‌و دژی بوون.

بە هەمان شێوە هەردوو فریشتەكەش سیحربازیی هیچ كەسێك لەوانەی كە سیحرەكەشیان لێوە فێربوون، زیانیان پێ‌ناگەیەنێت، چونكە دوای ئەوە بووە، كە ڕێ‌ی كارەكەیان لـێ‌ گرتوون‌و نكووڵییان لـێ‌ كردوون‌و ئامۆژگاریشیان كردون‌و، پێ‌یان گوتبوون: (ئێمە هۆی تاقیكردنەوە‌و هەڵسەنگاندنتین‌و، تۆش بەمە كافر‌و بێ‌باوەڕ مەبە: ئیدی ئەم دوو فریشتەیە بەو وتەیەی خۆیان فەرمانی سەرشانی خۆیان جێبەجێ‌ كردوە( )".