ماڵپەری قورئانی پیرۆز

(سابیت)یش وتاربێژی پێغه‌مبه‌ری خوا و (صلی الله علیه وسلم) ئیسلام بوو..

 

وشه‌كان به‌ به‌هێزی و، به‌رزی و، پڕ واتایی و، جوانی له‌ زاری ده‌هاتنه‌ ده‌ر..

له‌ساڵی شانده‌كاندا، شاندێكی (به‌نی ته‌میم) هاتنه‌ مه‌دینه‌ و به‌ پێغه‌مبه‌ری خوایان(صلی الله علیه وسلم) وت:

{هاتووین شانازیه‌كانی خۆمانت بۆ باس بكه‌ین، جا مۆڵه‌ت بده‌ به‌ شاعیر و وتاربێژه‌كه‌مان}..

پێغه‌مبه‌ریش(صلی الله علیه وسلم) زه‌رده‌خه‌نه‌ گرتی و، پێی فه‌رموون:

{ئه‌وه‌ مۆڵه‌تم دا به‌ وتاربێژه‌كه‌تان، با بڵێت}..

جا (عوطاردی كوڕی حاجب) هه‌ستا و خۆی هه‌ڵده‌كێشا به‌ شانازیه‌كانی هۆزه‌كه‌یه‌وه‌.. كاتێك كه‌ لێ‌بوویه‌وه‌، پێغه‌مبه‌ر(صلی الله علیه وسلم) به‌ (سابیتی كوڕی قه‌یس)ی فه‌رموو: هه‌سته‌ وه‌ڵامیان بده‌ره‌وه‌..

(سابیت)یش هه‌ستایه‌وه‌ وتی:

{سوپاس و ستایش بۆ خوا، كه‌ ئاسمانه‌كان و زه‌وی دروستكراوی ئه‌وه‌و، فه‌رمانی خۆی تێدا به‌دی هێناون و، به‌ زانینی كورسیه‌كه‌ی فراوان كردووه‌، هیچ شتێك نیه‌ هه‌رگیز له‌ فه‌زڵی ئه‌و نه‌بێ‌..

پاشان به‌ توانای ئه‌وه‌ی كه‌ كردووینه‌تیه‌ پێشه‌واو، له‌ چاكترین دروستكراوانی خۆی نێردراوێكی هه‌ڵبژارد، كه‌ بنه‌چه‌ی له‌ هه‌موان رێزدارتره‌ و، له‌ هه‌موان راستگۆتره‌ و، له‌ پایه‌دا له‌هه‌مووان باشتره‌، جا په‌یامی خۆی بۆ نارده‌ خوارێ‌ و، كردیه‌ متمانه‌پێكراوی له‌سه‌ر دروستكراوه‌كانی، جا هه‌ڵبژارده‌ی خوا بوو له‌ ناو هه‌موو خه‌ڵكدا..

پاشان خه‌ڵكی بانگ كرد بۆ بڕواهێنان پێی، جا كۆچكارانی هۆزه‌كه‌ی و خزمانی نزیكی بڕوایان پێ‌ هێنا و,, باشترین خه‌ڵك له‌ ڕه‌چه‌ڵه‌كدا و، چاكترینیان له‌ كرده‌وه‌دا..

دواتر ئێمه‌ی ئه‌نصار یه‌كه‌مین كه‌س بووین به‌ ده‌میه‌وه‌ چووین..

جا ئێمه‌ پشتیوانی خودا و، وه‌زیره‌كانی پێغه‌مبه‌ره‌كه‌ین}(صلی الله علیه وسلم)...