ماڵپەری قورئانی پیرۆز

    سعيد عبدالرحيم....خوای گەورە لە ئایەتی ۷۹ی سورەتی الاسرائدا؛ ڕووبە بە پێغەمبەری خۆشەویست دەفەرموێ  (وَمِنَ اللَّيْلِ فَتَهَجَّدْ بِهِ نَافِلَةً لَّكَ عَسَىٰ أَن يَبْعَثَكَ رَبُّكَ مَقَامًا مَّحْمُودًا)، واتە: لەگەڵ نوێژە فەرزەکاندا شەوانە هەستە نوێژ بۆ پەروەردگارت بکە، بەو هیوایەی پەروەردگارت بە مەقامی مەحمودت بگەیەنێت.
زانایان لە تەفسیری ئەو مەقامەدا، چەند ڕاڤەیەکیان کردووە، بەهێزترینیان ئەم دوانەن:
یەکەم: مەقامی مەحمود باڵاترین و نزیکترین شوێنی بەهەشتە لە پەروەردگارەوە، بە تەنها یەک کەسیش دەدرێت، پێغەمبەری خوا فەرموویەتی ئومێدەکەم ئەو کەسە من بم.
دووەم: مەقامی مەحموود، بریتییە لە پێگەی شەفاعەتکردن بۆ خەڵکی، لە ڕۆژێکدا کە هەمووان پێگیراون و چاوەڕێی کەسێکی فریادڕەسن، هەستێ و ببێتە شافیع و تکاکار لای پەروەردگار، لەوێدا پێغەمبەری خۆشەویست، سەری موبارەکی دەخاتە سەر زەوی و بەرزی ناکاتەوە تا خوای گەورە دەفەرموێ: ئەی موحەممەد هەستە شەفاعەت بکە شەفاعەتی تۆ ڕەدناکرێتەوە.
پێغەمبەری خۆشەویست ﷺ دەفەرموێ: هەر کەسێک لە دوای بانگبێژی نوێژەکان داوای وەسیلەو (مەقامی مەحمودم) بۆ بکات، لە ڕۆژی دواییدا شەفاعەتی منی بۆ مسۆگەر دەبێت.
ئەمەش شێوازی نزاکردنەکەیە، بەو هیوایەی لە کاتی بانگەکاندا وەڵامی بانگبێژ بدەینەوەو پاشان ئەم نزایە بکەین، بە ئومێدی ئەوەی بەر شەفاعەتی پێغەمبەری خۆشەویست بکەوین:
(اللهم ربَّ هذه الدعوةِ التامة، والصلاة القائمة، آتِ محمدًا الوسيلةَ والفضيلة، وابعَثْه مقامًا محمودًا الذي وعَدْتَه).