ماڵپەری قورئانی پیرۆز

(محمد راتب النابلسي)......مامۆستا بووم لە قوتابخانەیەکی ناوەندی، سەعاتێک پشووم هەبوو، ماڵمان دوور بوو، تا بڕۆم و بگەڕێمەوە، ناچارووم لە قوتابحانە بمێنمەوە، بیرم کردەوە سەردانێکی بەڕێوەبەر بکەم کە هاوڕێیەکی نزیکم بوو.
پێشوازییەکی گەرمی لێکردم و کوپێ چایی پێشکەش کردم، ئیتر دەستیکرد بە شەکوای حاڵی خۆی و بێزاربوونی لەم ژیان و دۆخەی ئێستای، دڵخۆشبوو کە بەو نزیکانە سەفەری جەزائیر دەکات و ڕەزامەندی بۆ وەرگیراوە.
وتی: دەڕۆم و لەوێ پشوویەک ئەدەم و مووچەیەکی باش وەردەگرم، پێنج ساڵ لەوێ دەمێنمەوە، نامەوێ هاوینانیش بگەڕێمەوە، ئەمەوێ هاوێنێک لە پاریس و هاوێنێک لە ئیسپانیاو هاوینێک لە ئەڵمانیاو هاوینێک لە ئیتالیاو هاوێنێک لە بەریتانیا بەسەر بەرم.
 ئەمەوێ ئەو وڵاتانە ببینم و شارو لادێ و مۆزەخانەو شارستانیەتی ڕۆژئاوا ببینم، جا دوای ئەو پێنج ساڵە، بە پارەیەکی باشەوە دەگەڕێمەوە و ڕاستەوخۆ خۆم خانەنشین دەکەم و خۆم لە سەرێشەی دەوامکردن ڕزگاردەکەم.
بەنیازیشم بەو بڕەی پارە باشەی کە لەگەڵ خۆم هێناومەتەوە، لە شوێنێکی بازرگانی و دیاری ناوشاردا ئۆفیس و مۆزەخانەیەک بکەمەوە، بۆ ئاسەوای کۆن و کەلوپەلی خۆماڵی و نەختینە و، دەیکەمە خانەیەکی فکری و ئەدەبی.
ووتی تا ئەو کاتە منداڵەکانیشم گەورە دەبن، ژن بۆ کوڕەکان دێنم و ئۆفیسەکەیان ڕادەست دەکەم، ئیتر خۆیشم ئێواران لەگەڵ هاوڕکانما لە مۆزەخانەکە بۆ خۆمان لێی دادەنیشین و بەدەم قاوەخواردنەوەوە بیرەوەری و یادگاریەکانمان دەگێڕینەوە.
ماوەیەکی باش گوێم بۆ گرت و ئەویش بە زمانێکی ڕەوان و پاراو قسەی بۆ دەکردم و نەخشە ڕێگای خۆی بۆ باسدەکردم کە بەو حسابەی ئەو بەرنامەی ۳۰ ساڵی داهاتووی تەمەنی بوو.
دوای دیدارەکەمان، دەوامی قوتابخانەم تەواوکردو گەڕامەوە بۆ ماڵ، نانی نیوەڕۆم و خوارد و ڕۆشتم بۆ پرۆژەیەکی تایبەت بەخۆم لەناو جەرگەی شار، ئۆتۆمبلێم نەبردو بەپێ ڕۆشتم و گەڕامەوە.
سوێن بەو خوایەی کە جگە لەو خوایەکی تر بوونی نییە، هەمان ڕۆژ، لە کاتی گەڕانەوەمدا لافیتەی مردنەکەیم بینی !!!
دیدارەکەی نێوانمان کاتژمێر ۱۱ی پێش نیوەڕۆ بوو، کاتژمێر ۷ی ئێوارە لافیتەی مردنەکەیم بە دیوارەوە بینی!!!!!
ئەوە پەیامی مردنە مردن، کە لە بۆسەدایەو خۆی مەڵاسداوەو نازانین کەی یەخەمان دەگرێت و کۆتایی بە خولیاو ئاواتەکانمان دێنێت !!!
چیمان بۆ ئەو چرکە ساتە هەستیارو چارەنووسسازە ئامادەکردووە.
.