ماڵپەری قورئانی پیرۆز

نووسینى : م. حیدر محمد

١- هانى قوتابیه‌که‌ت بده‌ کاتێک کارێکى چاک ئه‌نجام ده‌دات، رێگاى زیاترى بۆ رۆشن بکه‌وه‌.
٢- رێزى قوتابیه‌که‌ت بگره‌، ئه‌گه‌ر ده‌ته‌وێت رێزى تۆ بگرێت.
٣- به‌ گفتوگۆ و قسه‌ له‌گه‌ڵ کردن قوتابى فێربکه‌، کاتێک پێویستیه‌کى هه‌بوو داوا له‌ تۆ بکات، تۆش بۆى جێ به‌جێ بکه‌.
٤- هاوار به‌سه‌ر قوتابى دا مه‌که‌ و به‌سه‌ریدا هه‌ڵمه‌شاخه‌.
٥- به‌ شتێک قوتابى مه‌ترسێنه‌ که‌ ده‌سه‌ڵاتت به‌سه‌ردا نیه‌ و ناتوانیت جێ به‌جێ ى بکه‌یت.
٦- هه‌میشه‌ کارى ئاسان و رێگاى ئاسان و پرسیارى ئاسان ئاراسته‌ى قوتابیه‌که‌ت بکه‌، خۆت له‌ شتى ئاڵۆز و گران به‌ دوور بگره‌.

٧- رێگا بۆ هاتنه‌ پێشه‌وه‌ى یه‌که‌ یه‌که‌ى قوتابیه‌کان خۆش بکه‌ ، هیچ کامێکیان پشت گوێ مه‌خه‌.

٨- هه‌میشه‌ رقت له‌ کرده‌وه‌ى ناشرین ببێته‌وه‌ نه‌ک که‌سه‌که‌ خۆى.
٩- به‌خۆشترین ناو بانگى قوتابیه‌که‌ت بکه‌.
١٠- لێبورده‌ییت زۆر بێت و سنورێکى فراوان بۆ قوتابیه‌که‌ت دابین بکه‌، بۆ ئه‌وه‌ى هه‌ڵه‌کانى چاک بکاته‌وه‌.
١١- هه‌میشه‌ وا سه‌یرى قوتابیه‌که‌ت بکه‌ که‌ به‌ توانا و به‌هێزه‌، گومانى خراپى بۆ هه‌ڵمه‌به‌سته‌.
١٢- قسه‌یه‌ک بۆ قوتابیه‌که‌ت مه‌که‌ که‌ خۆت به‌کرده‌وه‌ نه‌ت کردبێ، داواى فێربوونى شتێک له‌ قوتابى مه‌که‌ که‌ خۆت نایزانى.
١٣- به‌رده‌وام خۆشه‌ویستى و گرنگى پێدانى خۆت بۆ قوتابیان دووباره‌ بکه‌وه‌.
١٤- هه‌رگیز پشت له‌ ئامۆژگارى قوتابیان مه‌که‌، چونکه‌ قوتابى له‌ ئاو زیاتر پێویستى به‌ ئامۆژگارییه‌.
١٥- به‌ سه‌لام کردن و رووى خۆش یه‌که‌م چرکه‌ى رووبه‌روو بوونه‌وه‌ت له‌گه‌ڵ قوتابى ده‌ست پێبکه‌.