ماڵپەری قورئانی پیرۆز

له‌ هه‌ندىَ ته‌فسیر دا وا هاتووه‌ كه‌ ( فَزَادَهُمُ اللَّهُ مَرَضًا ..) له‌ بابه‌تى (( الجزاء من جنس العمل )) ه‌. به‌ڵام وه‌هاى ئه‌بینم كه‌ چاكتر وه‌هایه‌ شێوه‌یه‌ له‌ ماناى ئایه‌ته‌كه‌ بچینه‌ پێشه‌وه‌ . 

خواى گه‌وره‌ دڵیانى زیاتر نه‌خۆش خستووه‌,چونكه‌ ئه‌وانه‌ له‌ ئاستى نیه‌ت دا به‌ خراپكاریى و له‌ خوا یاخى بوون چه‌په‌ڵ بوون و , هه‌رچى هه‌ڵكێشان بۆ هه‌ڵ كه‌وتبىَ هه‌وڵیان داوه‌ ئه‌و نیه‌ته‌ خراپه‌یان جىَ به‌جىَ بكه‌ن و , هه‌تا هۆكاره‌كانیش زیاتر بووبن , ئه‌نجامه‌كانیش زیادیان كردووه‌ . ئه‌مه‌ش ئه‌وه‌ ئه‌گه‌یه‌نىَ كه‌ چونه‌ته‌ ناو ئه‌ڵقه‌یه‌كى بۆشه‌وه‌ . واته‌ ئه‌وان نه‌یان توانیوه‌ دڵه‌كانیان له‌م نیه‌ته‌ خراپانه‌ رزگار بكه‌ن , بگره‌ به‌ هیچ شێوه‌یه‌ك بیریان له‌مه‌ نه‌كردوه‌ .

جا ئه‌م نیه‌ته‌ خراپانه‌ نیه‌تى خراپى تریان لىَ كه‌وتنه‌وه‌  ئه‌و كرده‌وانه‌ش كه‌ له‌سه‌رئه‌م نیه‌تانه‌ بینا كران كره‌وه‌ى تریان به‌رهه‌م هێنا و لێیان كه‌وتنه‌وه‌ , به‌ چوونه‌ ناوى ئه‌م جۆره‌ ئه‌ڵقه‌ بۆشه‌وه‌ مونافیقه‌كان تیاچوون . كه‌واته‌ كاتێك كه‌ ته‌فسیرى ئایه‌تى (فزادهم الله مرێا) ئه‌كه‌ین , له‌سه‌رمان پێوسته‌ ماناكه‌ى به‌ شێوه‌ى ئه‌نجامێكى سروشتیى بۆ چوونه‌ ناو ئه‌م ئه‌لقه‌ بۆشه‌وه‌ سه‌یر بكه‌ن . 

له‌ش ساغیى بناغه‌ى یاسایه‌و , نه‌خۆشییش شتێكى لابه‌لایه‌ . به‌ هه‌مان شێوه‌ فطره‌ى ساغ بناغه‌یه‌و , نه‌خۆشى دڵیش لاوه‌كیه‌ . له‌به‌ر ئه‌مه‌ هه‌ر كه‌س گرنگیى به‌ دروستى دڵى و, پاراستنى و ئاماده‌كردنى هه‌موو مه‌رجه‌ مه‌عنه‌وییه‌كانى پاراستنى نه‌دات, ئه‌وا ئه‌و پارچه‌ ناسكه‌ خوایى یه‌ ئه‌كاته‌ پاروویه‌كى چه‌ور بۆ ڤایرۆس و میكرۆبه‌كان . له‌گه‌ڵ ئه‌وه‌دا كه‌ له‌وانه‌یه‌ سه‌ره‌تا شتێكى بچووك بێت , هه‌نگاونان له‌ هه‌ڵیه‌كه‌وه‌ بۆ هه‌ڵه‌یه‌كى ترو , له‌ تاوانێكه‌وه‌ بۆ تاوانێكى ترو , له‌ یاخى بوونێكه‌وه‌ بۆ یه‌كێكى تر , له‌ كۆتاییدا ئه‌بێته‌ هۆى كرانه‌وه‌ى گۆشه‌كه‌و , روودانى تاوانى وه‌ها گه‌وره‌ كه‌ بریتین له‌ شه‌ریك بۆ خوا دانان چونكه‌ چه‌ندین رىَ هه‌ن , كه‌ به‌ره‌و كوفر سه‌ر ئه‌كێشن .

ئه‌گه‌ر به‌رباد بوونى عه‌قیده‌ , یان تلانه‌وه‌ له‌ناو گومان و دوودلى یه‌كان دا نه‌خۆشى مونافیقیان بێت , له‌ هه‌مان كاتدا ماناى وه‌هایه‌ كه‌ كوفرو ئیلحاد لىَ هاتنێكى شاراوه‌یان هه‌یه‌ . جا ئه‌گه‌ر چاودێریى خواى فریاى ئه‌م نه‌خۆشیه‌ نه‌كه‌وێت و , ئه‌و ئه‌ڵقانه‌ نه‌شكێنىَ كه‌ گه‌یه‌نه‌رى كرده‌وه‌یاخى بوونه‌كانن به‌ كوفر , ئه‌وا كرده‌وه‌ یاخى بوونه‌كان , به‌وه‌ى كه‌ چه‌ندین قات زیاد ئه‌كه‌ن , له‌وانه‌یه‌ ببنه‌ مایه‌ى كافر كردن .بگره‌ هه‌ندىَ جار ئه‌وه‌ رووئه‌دات كه‌ كاتىَ مرۆڤ گومان و دوودڵى ئه‌ده‌ن , له‌وانه‌یه‌ ببێته‌ هۆیه‌ك بۆ پچرانى  هێڵى گه‌یه‌نه‌رى نێوان خۆیى و خوا, به‌مه‌ش گومان له‌ هه‌موو شتێك زیاد ئه‌كات و, وه‌هاشى له‌ قه‌ڵه‌م ئه‌دا كه‌ ئه‌و و هه‌موو خه‌ڵكێكى له‌م گومانه‌دایه‌كسانن , ئیتر له‌ كه‌ش و هه‌واى ئه‌م گومانه‌دا چه‌ند قات چه‌ند قات ئه‌تلێته‌وه‌ . كاتێك كه‌ ده‌رباره‌ى ئه‌و هێله‌ى به‌ خواى ئه‌گه‌یه‌نێت گومان ودوودڵى ده‌ورى لێ ئه‌ده‌ن و به‌رامبه‌ر به‌ هه‌موو شتێك گومانى ئه‌بێت و, شتانیش  ( به‌پێوانه‌ى خۆى) له‌ قه‌له‌م ئه‌دات ,ئه‌وا له‌ گومان و دوودڵى و راراى , له‌ ئاستى ئیلحاددا, ئه‌تلێته‌وه‌ , خۆى وه‌ها ئه‌ژیت و, وه‌ها وه‌همیش ئه‌بات كه‌ كه‌سانى تریش وه‌ك خۆى بىَ ئیمان و بىَ گوىَ رایه‌لین و , ناگونجىَ متمانه‌یان پىَ بكرىَ یان پشتیان پىَ ببه‌سترىَ... واته‌ له‌ جیهانێكدا ئه‌ژى كه‌ ئه‌ندێشه‌ و وه‌همه‌ نه‌خۆشه‌كه‌ى دروستیان كردووه‌و, سه‌ره‌نجامش له‌ ژێر بارى ئه‌و نه‌خۆشیانه‌دا ورد و خاش ئه‌بێت .